DILI, STLTIMORLESTE.com – Membru Parlamentu Nasional (PN) liu husi Deputadu Mariano Fernando Malik husi Bankada Partidu Demokratiku (PD), husu ba Governu atu tau atensaun ba fatin pupliku sira hanesan Tibar, Dolok oan no Likisa, fatin hirak nee sai hanesan fatin publiku, maibe daudaun nee sai hanesan fatin privadu.
Lia hirak nee hatoo husi Deputadu Mariano Fernando Malik ba jornalista sira iha resintu Parlamentu Nasional (PN), Segunda nee (23/06/2026).
“Ita obsrerva iha tasi ibun sira nee kompanhia balun komesa ba ateru ona iha area Tibar, Likisa, Dolok Oan, komesa privatiza ona tasi ibun nee sai ona privadu, tuir lei katak husi 100 metru husi area foho nee publiku nian laos privadu,” katak Deputadu Malik.
Nia dehan, area hirak nee mak sai hanesan fatin publiku, oras nee daudaun sai hanesan fatin privadu husi individu sira no mos okupa husi sidadaun sira neebe laiha fatin, tanba nee mak preokupasaun nee atu halo kedas intervensaun nunee aban bainrua labele hamosu problema entre sidadaun ho governu.
“Situasaun sira nee komun, neebe ita haree no presiza tau atensaun ba espasu publiku sira para prevene kedas karik aban bainrua estadu halo programa ruma karik ita labele ba ho modelu ida konpensasaun ka indimnizasaun, tanba area sira nee pertense ba fatin pupliku nian,” nia afirma.
Nunee iha fatin seluk hanesan Jardim 05 de Maio fatin neebe mak lokaliza iha Jardin 05 de Maio nia kotuk nee uma estadu nian, oras nee daudaun komunidade sira okupa hela, fatin nee iha kedas sentru sidade Dili fo imajen la diak ba nasaun nee nian.
“Husu ba governu atu koordena no organiza didiak para oinsa mak muda sidadaun sira husi fatin nee konsidera sira nia direitu ba okupasaun neebe mak tempu naruk, maibe ida nee obrigatoriamente governu organiza para sidade nee sai imajen neebe mak diak ba ita nia nasaun,” dehan Malik.
Nia dehan, espasu publiku nee privatiza husi kompanhia no ida husi komunidade neebe mak laiha fatin atu hela ba, kompanhia lokal no kompanhia internasional, kompanhia balun hetan arendimentu husi governu maibe sira privatiza tan fatin balun sai espasu publiku, nunee husu ba Governu atu haree no kordena didiak para idak-idak iha ninia koredor de espasu.
Hatan ba preokupasaun nee, Visi Ministru Asuntu Parlamentar, Aderito Hugo da Costa envia ona ba parte relevante sira liu-liu ba iha Ministeriu Justisa no Terras Propriedade hodi halo jestaun ba arendamentu nee.
“Hau envia ona ba Ministeriu relevante liu-liu Ministeriu Justisa no Terras Propriedade neebe mak halo jestaun ba emiti kontratu arendamentu ba entidade sira nee, nunee sidadaun sira tau atensaun ba kestaun sira nee hotu bele hetan arendamemtu ba espasu publiku nee maibe respeita mos espasu publiku neebe governu investe, agradese tebes ba Deputadu Mariano Fernando Malik neebe mak haree ba asuntu ida nee ho konkreta atu husu Governu bele kurizi,” nia dehan.
(EST 01)
