DILI, STLTIMORLESTE.com – Membru Parlamentu Nasional liu husi Deputada Marquita Soares husi Bankada FRETELIN, husu ba Ministeriu Edukasaun (ME) atu tau atensaun ba eskola sira neebe mak laiha profesores.
Lia hirak nee hatoo husi Bankada FRETILIN, Deputada Marquita Soares ba jornalista sira iha plenaria Parlamentu Nasional (PN), Tersa (16/09/2025).
“Presiza fo hanoin ba Ministeriu Edukasaun (ME) atu tau atensaun ba eskola sira neebe mak laiha profesores hodi hanorin estudante sira, tanba estudante sira mak futuru nasaun nian,” dehan Deputada Marquita.
Deputada nee dehan, eskola ida iha Munisipiu Vikeke, Postu Administrativu Watukarbau, Suku Batata, eskola nee naran Bobulale, neebe mak iha profesores nain ida deit, iha sala tolu (3) maibe profesores ida deit mak hanorin materia hamutuk 14.
“Primeiru hatoo ba iha Ministeriu Edukasaun liu-liu ba iha eskola ida naran Ubusege, iha Munisipiu Vikeke, Postu Watulari, neebe mak too agora profesores laiha, nunee estudante sira labele hetan materia ba aprendizajen ninia,” katak deputada nee.
Iha fatin hanesan, Deputadu Natalino dos Santos husi Bankada CNRT hatutan, iha Munisipiu Kovalima, Postu Administrativu Zumalai, Suku Louro, Aldeia Sumoknua, fatin neeba izoladu tebes laiha eskola, tanba nee husu ba Ministeriu Edukasaun atu tau atensaun ba asuntu nee.
“Fatin ida neeba nee mos laiha eskola iha tempu Portugues iha eskola filial ida mak iha neeba, maibe tanba funu eskola laiha tiha, kuaze 40 ital uma kain iha neeba labele asesu ba edukasaun, tanba nee mak hau husu Ministeriu Edukasaun atu haree ba asuntu ida nee,” nia hakotu.
Entretantu hatan ba deputadu sira nia preokupasaun nee fo ba tekniku sira iha Parlamentu Nasional (PN) anota hela hodi hatoo ba parte relevante sira liu-liu ba iha Ministeriu Edukasaun hodi haree ba asuntu ida nee.
Jornalista: EST 1
Editor: Xisto Mendonça
