DILI, STLTIMORLESTE.com – Membru Polisia Nasional Timor Leste (PNTL) nain 1 neebe ultrapasa fronteira ho ilegal ba tuir graduasaun Grupu Arte Marsiais (GAM) Persaudaraan Setia Hati Terate (PSHT) iha Nusa Tenggara Timur (NTT), Atambua, iha Julhu liu ba, too agora seidauk iha medida sansaun disiplinar ruma.
Hatete Ministru Interior (MI), Francisco da Costa Guterres ba jornalista sira iha edifisiu MI Vila Verde, Sesta (15/08/2025).
Governante nee hateten, prosesu ba membru Polisia nain ida nee daudaun nee iha hela faze investigasaun hodi rekolha dadus ka evidensia sira molok aplika sansaun ba membru nee.
Tanba nee too agora Membru Polisia nee kontinua halao servisu hanesan baibain, tanba seidauk iha faktus ruma atu bele aplika medida sansaun ba nia.
“Investiga hela, kuandu estabelese faktus sira provadu sei hasai nia. Tanba nia ikompatabilide husi estatutu polisia ninian, tanba estatutu husu hili ida deit, hakarak polisia sai husi arte marsiais,” nia esplika.
Nia haktuir, kuandu prosesu investigasaun neebe halao husi parte Justisa, Komando PNTL nomos autoridade judisial sira mak iha faktus provadu sei hasai membru polisia ne’e hodi fila ba vida sivil.
“Ita tau matan ba sira no ita hakarak sira fokus deit ba servisu, maibe ba tama fali arte marsiais neebe la servi kontribui ba prosesu dezenvovimentu, entaun kuandu faktus sufisiente ita sei hasai,” nia informa.
Antes nee, iha loron Kinta 17 Julhu iha edifisiu MI, Diretor Diresaun Investigasaun Kriminal (DIK) Nasional, Superintendente Polisia, Joao Belo dos Reis deklara, Komando PNTL simu informasaun katak, Membru PNTL balu hamutuk ho funsionariu instituisaun estadu balu ultrapasa fronteira ilegal hodi ba sae sintu iha Atambua, Indonezia.
“Hakarak ba públiku katak, Komando PNTL simu ona informasaun relasaun ba funsionariu ou membru PNTL balu neebe mak partisipa mos graduasaun arte marsiais iha sorin. Ba membru PNTL neebe mak involve iha atividade refere, komando sei foti medidas rua, ida ba prosesu disiplinar no ida ba prosesu kriminal,” nia informa.
Nunee mos ba funsionariu estadu balu neebe mak involve iha graduasaun refere, komando PNTL sei foti medidas ba investigasaun disiplinar nomos haruka mós karta ba iha idak-idak nia diresaun atu toma medidas.
(jen)
