DILI, STLTIMORLESTE.com – Komandante Polísia Nasionál Timor Leste (PNTL) Munisípiu Dili, Superintendente Xefe Polísia Orlando Gomes hateten, membru PNTL Komando Munisípiu Dili iha nain 20 resin mak tama ona ba idade reforma.
“Komando Munisípiu Dili identifika membru 20 resin mak tama ona iha idade reforma, husi membru 20 resin nee iha nain 15 mak nia saude ladun diak tanba moras,” Superintendente Xefe Polísia Orlando ba jornalista sira iha nia knaar fatin Eskuadra Dom Aleixo, Komoro, Tersa (22/04/2025).
Nia esplika, ba membru sira neebe saude la diak, agora daudaun Komando PNTL Munisípiu Dili prepara hela lista hodi hatoo iha Komando Jeral, hodi husu ba Xefe Departamentu Saude Komando Jeral PNTL atu tau matan ba membru PNTL Munisípiu Dili neebe moras.
“Ita hatoo ona lista ba Komando Jeral no CC ida mos ba iha ita nia Xefe Departamentu Saude Komando Jeral PNTL nian atu nunee bele halo tratamentu ka check-up sira nia saude,” nia informa.
Nia hatutan, membru Komando PNTL Dili neebe moras tenke check-up tanba sira nia saude nee importante, atu nunee sira nia saude bele re-koopera fila fali, tanba durante sira balun ladún efetivu ona halo sira nia funsaun tanba kestaun saúde.
Nia haktuir, Departamentu Saude Komando Jerál PNTL agora daudaun iha programa vizita membru PNTL too iha sira nia uma, ho nunee Departamentu Saude Komando Jerál bele vizita nain 15 ba too sira nia uma hodi fo tratamentu ba sira.
“Ita nia Departamentu Saude Komando Jeral nunee kontinua tau matan ba sira. Tanba Xefe Departamentu Saude Komando Jeral PNTL iha nia programa ida sempre halo monitorizaun ba membru PNTL neebe moras sempre halo check-up beibeik no dala ruma membru PNTL neebe mak moras sira bele ba too iha nia uma hodi tau matan ba membru sira nee nia moras,” nia deklara.
Orlando hatutan, agora daudaun Komando PNTL Munisipiu Dili iha efetivu 480 ho ema na’in 20 resin neebe reforma nee klaru ke Komando PNTL Munisípiu Dili iha rekursu limitadu.
Iha fatin hanesan, Akademista Universidade Nasional Timor Lorosae (UNTL), Paulino da Costa informa, membru PNTL neebe tama ona reformadu tenke deskansa ona, tanba sira nia idade mos labele ona atu halao atividade PNTL nian.
“Ita haree idade 70 ba leten ona nee idade neebe reformadu ona, sira nee persiza deskansa ona iha uma nomos bele tratamentu sira nia saúde ho diak, tanba nee husu Governu atu loke lalais rekrutamentu ba PNTL foun nee, tanba membru PNTL menus liu iha terenu,” nia afirma.
(jen)
