DILI, STLTIMORLESTE.com – Durante tinan 2024, hahu husi Janeiru too Dezembru, Departamentu Justisa no Disiplinar iha Polísia Nasional Timor Leste (PNTL) rejista membru hamutuk nain 232 mak komete kazu disiplinar iha territoriu laran.
Hatete Komandante Departamentu Justisa no Disiplinar, Superintendente Xefe Menezes ba jornalista sira iha nia knaar fatin Komando Jeral PNTL, Dili, Kuarta (15/01/2025).
Nia dehan, membru nain 232 neebe komete kazu disiplinar nee ho tipu abandona servisu, envolve iha kontra bandu no falta servisu, agresaun fízika, kontra ordem Komando, servisu la profisionál no kazu seluk tan.
“Iha tinan 2024 nee ita rejistu membru PNTL nain 232 mak komete iha kazu disiplinar hahu husi naional, munisipiu too eskuadra sira iha territoriu laran,” nia esplika
Nia informa, husi membru nain 232 nee konklui ona prosesu hamutuk 166 no sei iha prosesu nia laran hamutuk 66, balu hotu ona, maibe seidauk iha desizaun.
Maibe total kazu neebe prosesu disiplinar iha territoriu Timor laran tomak, signifika iha 13 Komando Munisipiu ho Diresaun Justisa no Disiplinar kazu durante tinan ida iha 232.
Nunee iha tinan 2024 nee laiha demisaun, mais iha tinan 2023 no 2022 neebe mak iha agora sei prosesu, tanba proposta ba demisaun nee iha haat, iha konselhu superior iha ona desizaun mais seidauk iha desizaun final husi Ministru Interior.
Iha fatin ketak, Diretor Ezekutivu Fundasaun Mahein (FM), Nelson Belo dehan, membru PNTL sira neebe mak komete kazu nee Komando tenke aplika sansaun rigorozu, atu nunee sira bele evita, se lae nafatin ho sira nia hahalok nee.
“Fundasaun Mahein husu atu aplika lei, liu-liu lei organika PNTL nian ho seriu hodi bele kontrola hahalok krimi membru sira nian,” nia salienta.
(EST 1)
