DILI, STLTIMORLESTE.com – Daudaun nee Governu liu husi Komando Polisia Nasional Timor Leste (PNTL) realiza serimonia desvinkulasaun ba membru PNTL hamutuk nain 505 husi Arte marsiais no Arte Ritual, no hakarak servi deit ba povu no nasaun ida nee.
Ministru Interior (MI), Francisco da Costa Guterres dehan, lori Governu nia naran hakarak hatoo obrigadu ba membru PNTL, tanba hatudu ona onestidade hodi hakarak servi deit Estadu no rai ida nee.
“Kuaze maioria desvinkula ita nian aan ona husi Arte Marsiais, no imi agora hahu halao servisu neebe diak tebes-tebes, tanba agora ikus-ikus nee ita haree hatudu postura ida hanesan membru PNTL, postura ida neebe neutru, hakarak servi deit ba rai ida nee, hakarak hametin deit pas no estabilidade iha komunidade nia leet,” hatete Ministru Interior (MI), Francisco da Costa Guterres ba jornalista sira iha Komando Jeral PNTL, wainhira partisipa serimonia desfinkulasaun husi Membru PNTL nian, Segunda (10/03/2025).
Nia tenik, membru PNTL tenke halo servisu ho neutralidade ho diak no garante pas no estabilidade ba rai ida nee. Tanba nee Komando PNTL responde kedas desvinkulasaun hahu kedas iha 7 Dezembru 2023, mais molok ida nee PNTL responde uluk ona tau nia aan iha partidu no polítiku balu neebe duni sira ba halo juramentu hodi hakarak sai husi partidu no polítiku, hakarak hili PNTL.
“Imi iha vokasaun ida neebe hakarak servi rai ida nee liu husi Instituisaun PNTL, tanba nee mak Governu estuda didiak situasaun neebe akontese iha 2023, deside atu forsa rua desvinkula husi Arte Marsiais neebe mak kria problema iha ita nia rai ida nee,” nia esplika.
Nia informa, Governu agradese tanba iha 2024 atividade hotu-hotu membru PNTL hakat liu ho diak, too vizita Papa Francisco mai TL.
“Ita boot sira hamutuk ho igreja katólika, hamutuk ho nivel komunitariu nomos nivel lokal sira mobiliza komunidade mai hodi atende misa, ita boot sira tau matan ba sira durante eventu sira nee lao ho di’ak tebes, ida nee hatudu katak, PNTL hatudu nia dezempenhu nia funsaun ho diak, mezmu ho situasaun ida neebe susar, mezmu ita ho kondisaun neebe seidauk di’ak liu, mais ita boot sira dezempenhu ita boot sira nia funsaun ho diak, hodi hametin pas no seguransa hodi hatudu ba mundu katak, TL mos nasaun ida neebe mak demokrátiku no nasaun ida neebe hadomi duni pas,” nia esplika.
Iha fatin hanesan, Prezidente Komisaun Reguladora Arte Marsiais (KRAM), Octavio da Conceição deklara, loron ikus ba faze prosesu desvinkulasaun neebe halao husi Komando Munisipiu sira no ikus liu mak Komando Jeral PNTL.
Nia apresia tebes ho Komandate sira, Xefe Assistente sira neebe forma ona iha nee, obrigadu ba imi nia onestidade no obrigadu ba imi nia loialidade ba Estadu, prosesu desvinkulasaun nuudar parte ida husi ita ninia juramentu no komitmentu ba servi nasaun no povu deit.
“Arte Marsiais nia instrumentu desportu ida deit, para atu demonstra ita nia dezenvolvimentu fiziku saúde mentál, maibé iha profisionalizmu ba servi Estadu no povu tenke tau interese Estadu nian iha oin,” nia informa.
Nunee mos Komandante Sentru Formasaun Polisia (SFP), Superintendente Xefe Polísia, Arquimino Ramos koalia, hahu despaisu husi Ministru Interior, Komando Jeral PNTL, loron 19 Dezembru 2023 hatoo despaisu mai iha Centro Formação Polícia (CFP) atu organiza no implementa despaisu husi Ministru Interior, Francisco da Costa Guterres nian.
Nia deklara, bazeia ba despaisu rua nee, CFP hasai karta ba munisipiu, unidade no departamentu sira atu identifika membru PNTL sira hodi perepra ba serimonia desfikulasaun.
“Serimonia dahuluk ita halao iha Munisipiu Likisa, no Komando munisipiu sira seluk lao tuir no oin ita halao serimonia desvinkulasaun ikus ba membru PNTL sira neebe sei hola parte ba Arte Marsiais no Arte Ritual, no husi Komando Jeral nomos CFP sei entrega atributu, no ohin ikus hodi entrega ba lider Arte Marsiais sira, katak PNTL la hola parte ona iha Arte Marsiais no Arte Ritual no ikus mak ida nee,” nia argumenta.
Nia afirma, total membru PNTL neebe partisipa ona iha serimonia desvinkulasaun hamutuk nain 505, ohin finaliza iha Komando Jeral no Imigrasaun.
(jen)
