DILI, STLTIMORLESTE.com – Ministru Interior (MI), Francisco da Costa Guterres hateten, membru Polisia Nasional Timor Leste (PNTL) 150 resin sei reforma obrigatoriu iha tinan 2026.
“Kona-ba membru polisia sira neebe sei reforma nee ita prepara ona, no iha tinan 2026 nee membru polisia hamutuk 150 resin mak sei reforma,” hateten Ministru Interior, Francisco da Costa Guteres, wainhira debate OJE tinan fiskal 2026 ba Ministeriu Interior, iha plenaria PN, Kuarta (19/11/2025).
Nia hatutan, Governu liu husi Ministeriu Interior sei hadia uluk lai rejime salarial ba membru polisia sira neebe idade tama ona ba 65, nunee bele trata membru polisia ho dignu molok tama ba reforma obrigatoriu.
“Antes tama ba reforma ita sei hadia lai sira nia rejime salarial nee, nunee tama ba idade reforma bele ho dignu, tanba sira dedika sira nia aan ba instituisaun nee durante tinan naruk nia laran,” dehan nia.
Nia hatutan, Ministeriu Interior mos prepara hela orsamentu liu husi OJE 2026 atu reintegra membru polisia sira neebe tama ona ba idade reforma obrigatoriu ba iha komunidade nia leet, hodi kontribui ba pas no estabilidade.
Iha fatin hanesan, Deputadu Bankada CNRT, Natalino dos Santos husu Ministeriu Interior atu aselera lalais lei renumeratoriu ba polisia sira, molok reforma membru polisia sira neebe idade tama ona ba 65.
“Iha tinan 2026 sei iha reforma obrigatoiriu ba membru polisia hamutuk 183, hau hakarak husu senhor ministru atu haree wainhira hakarak reforma ita nia ajente sira kuaze neebe kuze tinan 20 dedika sira nia aan ba estadu, maibe kondisaun saida mak estadu prepara hodi garante sira bainhira sira fila fali ona ba vida sivil,” dehan Deputadu Natalino.
Jornalista: Alberto Menezes
Editora: Carme Ximenes
