DILI, STLTIMORLESTE.com – Xefe Estadu Maior Jeneral FALINTIL- Forsa Defeza Timor Leste (F-FDTL), Tenente Jeneral, Domingos Raul ‘Falur Rate Laek’ husu ba membru Polisia Militar atu hatudu komportamentu no disiplina neebe diak, respeita ba irarkia Komando, hodi nunee hamutuk dezenvolve instituisaun F-FDTL ho diak liu tan iha futuru.
“Hanesan Xefe Estadu Maior Jeneral Forsa Armada, hau husu ba membru Polisia Militar sira, ita boot sira tenke hatudu komportamentu neebe diak no hatudu imi nia disiplina, hatudu iha pratika hodi servi intituisaun nee ho diak liu tan, kuandu imi iha komportamentu diak no disiplina diak, maibe servisu sira imi la tau iha pratika, nee servisu mos sei la lao,” hatete Tenente Jeneral, Domingos Raul ‘Falur Rate Laek’ ba jornalista sira, wanhira partisipa serimonia selebrasaun aniversariu Polisia Militar ba dala 20, iha Kuartel Polisia Militar, Kintal Boot, Dili, Sesta (17/1/2025).
Nia dehan, kuandu servisu hotu tau iha pratika, maibe membru Polisia Militar komportamentu no disiplina laiha, servisu sei la lao.
“Tanba nee husu ba imi, hatudu imi nia komportamentu no disiplina, hatudu imi nia lealdade tenke respeita ba irarkia Komando hodi hamutuk dezenvolve instituisaun militar,” nia esplika.
Nia husu ba Polisia Militar tenke kontrola ofisial militar neebe komete iha infrasaun militar, la obedese ba lei militar, kuandu hetan kestaun sira hanesan nee informa ba nia Komandante ka Komponente Komandante inklui seksaun sira atu hodi loke proseu ba sira.
Falur nota katak, iha ofisial militar sira balu ladun obedese ba iha regra militar nian, dala ruma la tau aan hanesan militar, tur hemu tua ho ema sivil sira, no dala barak mos membru F-FDTL balu halo fali intervensaun ba servisu balu neebe Polisia Militar halo iha terenu, kuandu mosu hanesan nee iha terenu mak Polisia Militar tenke toma nota hodi informa kedan ba nia komandante sira hodi halo prosesu.
Iha fatin hanesan, Komandante Polisia Militar, Major Mateus de Jesus hatete, kriasaun Polisia Militar bazeia ba lei numeru 15/2006, hahu ho efetivu pelutaun ida mak hanaran Maubere I. No 2005-2025 Polisia Militar hahu formasaun Maubere too formasaun Maubere VII, ba membru PM agora hamutuk nain 259.
“Komemorasaun ida nee laos atu festeza deit, maibe nuudar oportunidade mai ita atu hanoin hikas fali saida deit mak ita halo ona iha pasadu. Pasadu hanesan lisaun ida hodi hadia buat neebe ita haree katak presiza duni ita hotu atensaun. Parabens ba ita boot sira nia disiplina dedikasaun, espiritu korpu, korajen ho abnegasaun hodi servi unidade Polisia Militar ho diak,” afirma.
(jen)
