DILI, STLTIMORLESTE.com – Membru Unidade Patrollamentu Fronteira (UPF) ho naran Benjamin dos Santos, neebe tiru aan ho pistola iha hariis fatin Postu Ponte Nunura, Suku Leo-Lima, Postu Administrativu Balibo, Munisipiu Bobonaro, daudaun nee prosesu investigasaun lao hela.
Komandante Jerál PNTL, Komisáriu Jerál Polísia Henrique da Costa dehan, membru PNTL tiru aan iha Kuarta (29/10/ 2025) haleu tuku 15:00 OTL. Hafoin akontesimentu orienta kedan parte investigasaun kriminál nasional no forensiku ba kedan iha fatin neeba hodi halo servisu investigasaun.
“Komando seidauk hatene lo-loos motivu husi membru PNTL uza pistola tiru aan nee, tanba investigasaun sei halo hela servisu. Maibe iha buat balun neebe mak dala ruma ligadu ho presaun servisu mos,” dehan nia ba jornalista sira iha Komando Jeral PNTL, Sesta (31/10/2025).
Nia informa, dala ruma kazu sira hanesan akontese tanba haree ba kolokasaun membru sira iha neeba limitadu, entaun iha postu ida, ema nain rua, ema nain tolu, ida nee mos bele sai hanesan impaktu ida.
“Tanba ema kuandu servisu iha presaun, ho servisu ida neebe mak makaas nia bele foti desizaun mos halo hanesan nee,” nia koalia.
Komisáriu Jerál Polísia nee hatutan, kazu nee bele dehan psikólojia, tanba nee servisu iha presaun laran.
“Ema ida deit nia halo servisu 24 oras nia kontrola distansia neebe dook, ida nee sai mos hanesan ponténsia ida hotu”, nia afirma.
Henrique hateten, antes nes membru nee nia kondisaun normál. Tanba nee hein servisu investigasaun sei halao sira nia servisu, depois mak sira relata mai iha komando.
Jornalista: Jeniche da Costa
Editora: Domingas Gomes
