DILI, STLTIMORLESTE.com – Tinan nee implementasaun programa merenda eskolar hahu mudansa ba estudante sira, tanba hahu husi loron Segunda too Sesta estudante sira han aifuan.
“Merenda eskolar lao hanesan baibain, tanba tempu ezame ami iha kalendariu nee iha dia 7 too 11 fulan Abril nee merenda eskolar lao hanesan baibain, depois dia 14 too 25 fulan Abril nee koreksaun pontus ezame, entaun merenda laiha no merenda iha fila fali iha loron 28 fulan Abril. Menu ba merenda eskolar hahu mudansa oituan, tanba Segunda too Sesta nee estudantes sira han aifuan, tanba uluk Segunda too Kuarta deit mak han aifuan, maibe agora Segunda too Sesta nee ita nian estudante sira han aifuan,” haktuir Diretor Eskola Baziku Sentral (EBC) 10 de Dezembru Komoro, Calistro A. Guterres ba STL iha nia knaar fatin Komoro, Tersa nee (08/04/2025).
Nia dehan, aifuan neebe mak prepara ba estudantes sira nee mak hudi, aidila, apel, sabraka, ikan la tama merenda eskolar, ayam potong semana ida han dala ida, manu tolun, sesta nee han fore mungu ho susu been. Kona-ba alokasaun orsamentu ba programa nee, tanba EJP mak kaer direitamente, uluk eskola mak kaer.
“Dapur merenda eskolar, ami halo provizoriu ida, bainhira fornesedor sira tein ho ahi matan nee sira bele uza, maibe bainhira sira uza gas, nee sira uza eletrisidade, total estudantes 863 mak asesu merenda eskolar,” nia komenta.
Iha fatin seluk, Diretor Nasional Edukasaun Inkluzivu Asaun Sosial Eskolar (DNEIASE), Fernando Soares hatete, tuir dia efetivus nee oinsa atu haree iha implementasaun tuir kalendariu ka lae, tuir dia efetivus nee ka lae, nunee mos ninia objetivu nee atu haree, balun hahu no balun seidauk.
“Monitorizasaun nee agora daudaun halao iha kapital Dili no ba oin sei iha munisipiu seluk, tanba lao tuir etapa, tuir kalendariu neebe mak ita planea ona, tanba nee ita halo monitorizasaun hahu uluk ita nian eskola sira iha Munisipiu Dili,” tenik nia.
(jac)
