DILI, STLTIMORLESTE.com – Bainhira laiha investimentu mak menus empregu iha rai laran, difisil atu absolve graduadus neebe remata estudu iha universidade no barak sai dezempregu.
Pedro Marques do Rego hanesan graduadus husi UNPAZ, Fakuldade Ekonomia ba jornalista STL, Domingu nee (27/04/2025).
“Hau remata estudu iha 2023, maibe durante nee hatama dokumentus balun iha instituisaun publiku no privadu balun maibe la liu, tanba vaga neebe mak loke nee mos limitadu, dala ruma presiza ema nain 5 ou 10, maibe ema barak mak konkore depende ba sorte deit, tanba too ohin loron ita seidauk iha investimentu boot ruma para fo servisu ba ita neebe remata estudu, tanba nee menus empregu no graduadus neebe remata estudu barak sai dezempregu,” nia afirma.
Pedro dehan, maske durante nee la pasa iha vaga sira nee maibe la lakon esperansa, tanba too tempu ida bele iha rezultadu, pasiensia nafatin hodi tempu no sempre iha vontade atu konkore nafatin ba iha vaga hirak neebe fo sai liu husi media sosial.
Iha fatin seluk, Prezidente Institutu Politekniku Betano (IPB), Acacio Cardoso Amaral hatete, bainhira iha industria hanoin ba oin, nee dala ruma trabalhador mak falta, maibe situasaun ida agora daudaun nee industria seidauk mosu barak iha rai laran, presiza iha investimentu neebe barak liu tan, industria barak atu nunee bele absolve trabalhador barak liu tan iha rai laran.
“Ita boot sira hatene katak ita iha Timor nee, ita nian populasaun nee um pontu tres, maibe ita iha universidade hamutuk sanolu resin sia, universidade privada iha 17, publiku UNTL no IPB, agora ita nian industria mos seidauk dezenvolve ho diak,.hanesan ita boot sira mos hatene, tanba nee atu absolve hotu graduadus kada tinan nee araska oituan, tanba maioria agora setor publiku, governu halo rekrutamentu liu husi ninisteriu oin-oin maibe seidauk absolve hotu, setor privadu seidauk dezenvolve ho diak,” nia dehan.
Nunee mos Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
“Los duni too agora ita nian graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur,” nia afirma.
Entretantu Reitor ISC, Sebastião Pereira dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
(jac)
