DILI, STLTIMORLESTE.com – Ensinu Baziku Central (EBC) Manleuana sei menus manorin, tanba nee manorin sira tenke hanorin estudantes troka malu orariu, no husi parte eskola halo ona pedidu ba Ministeriu Edukasaun (ME) atu apoiu professores nain 8.
Haktuir Diretor EBC Manleuana, Carlos Correia ba STL Sagunda (16/02/2026).
“Dezafiu neebe mak agora dadaun ami infrenta nee maka ami nian eskola sei menus professores, no ami hein deit professores nivel ensinu baziku neebe mak husi ME atu koloka ba ita nia eskola sira. Ho manorin neebe mak menus iha, ami nia eskola nee mak ami husu apoiu professores nain 8 ba ami nian eskola,” nia esplika.
Nia akresenta, tanba sira iha turnu tolu,husi eskola halo pedidu husu apoiu professores nain ualu,maibe nee depende husi ME mak atu koloka mai iha eskola sira,nee duni manorin sira hanorin nee taka malu ba mai deit, hanorin meudia, no taka fali dader.
“Manorin sira hanorin taka malu deit,nee ba materia jeral,no ba iha materia espesifiku ninia,nee duni ita presiza atu aumenta tan professores ba ami nian eskola,ho nunee professores sira labele taka malu,” katak nia.
Iha fatin seluk,Direitor Nasional Ensinu Sekundariu iha ME,Benjamin Gomes da Cruz Fernandes,katak,kolokasaun BK professores neebe atu halo nee,ba nibel sekundariu mos,karik BK balun aseita atu hanorin iha nibel ensinu baziku nian,neebe mak lakohi,nee mos laiha buat ida,maibe agora sei tau prioridade ba BK professores ensinu baziku, tanba ensinu baziku mak professores menus tebes.
“ME halo esforsu ezersisiu hela,para oinsa iha tempu badak nian laran atu halo kolokasaun ba ita nian bolsa kandidatu professores,nibel ensinu sekundariu no Ensinu Baziku,agora sei halo servisu hela,para oinsa atu halo kolokasaun ba sira.Atu halo kolokasaun ba sira nee ami labele fo data,maibe ami hatete katak,molok fulan nee remata ami sei halo kolokasaun ida ba sira,” tenik nia.
Nunee mos,Direitor eskola sekundariu jeral finantil,Aniceto Berlelo,Relasiona ho menus professores iha Sira nian eskola nee,hatoo ona pedidu ba Ministériu,hodi nunee bele koloka Professores ba iha sira nian eskola.
“Ami nian professores la too ka la sufisiente Ida,nee ba materia portugues,tetum,inklui ba materia desportu ninia mos too agora seidauk iha professores,maske iha,maibe fleksibilidade sira hanorin,espesiál ba materia nee laiha,hau nian pedidu nee ami hatoo ona ba iha ME, nee kleur ona,” dehan Aniceto.
(jac)
