DILI, STLTIMORLESTE.com – Oras nee daudaun Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora Díli, presiza tan profesores nain 3 ba departamentu informatika.
“Ami iha profesores nain 3 mak tama ona reforma obrigatoriamente ba lista reformadu iha Jornal Repúblika tinan ida nee, ami nia dezafius mak hanesan menus profesor ba língua português no TMM ba socio sientifiku,.menus profesor produtivu iha area informatika, presiiza nain 3 iha area informatika Ou IT,” dehan Direitor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembro Becora Díli, Tomas Pinto ba STL, Segunda nee (19/01/2026).
Tomas hatutan, sira nian eskola presiza ekipamentus hanesan komputadores materiais departmentu eletronika nian. Presiza iha reabilitasaun ba sala de aulas neebe aat labele utuliza ona, presiza formasaun kontinua ba profesores produtivu nian, nee duni ba oin sira sei presiza tan profesores.
“Ami hatoo ona ami nia proposta ba BOMBEIROS atu bele kua Ai-matan dukur neebe prejudika ami hotu nuudar unidade eskolar ninia vida, presiza tesi hotu, ida nee ami enfrenta atu ba oin presiza iha solusaun,” nia dehan.
Iha sorin seluk, Diretor Eskola Sekundariu Jeral no 4 Setembru Balide, Sergio A. da Cruz dehan, kona-ba profesores iha sira nian eskola sufisiente hela no laiha problema, maske iha eskola seluk husu apoiu profesores ba sira nian eskola.
“Hau hanoin konaba profesores iha ami nian eskola sufisiente hela no laiha problema, maske iha eskola seluk husu apoiu profesores ba ami nian eskola,” nia deklara.
(jac)
