BAUKAU, STLTIMORLESTE.com – Relasiona Eskola Ensinu Baziku primeiru, segundu no terseiru siklu neebe enfrenta menus profesores, kontribui husi profesores neebe la kumpri oras ensinu 24 kada semana.
Diretor Servisu Edukasaun Munisipiu Baukau, Afonso dos Santos da Costa esplika, tuir oras ensinu nian ba kada profesores, iha dever hanorin estudante sira oras minimu 18 no masimu 24 kada semana, maibe durante akontese iha Munisipiu Baukau profesores balun hanorin deit oras 9 kada semana, tanba Diretor Eskola sira iha nivel sentral la haruka ba apoiu Eskola Filial sira neebe menus profesores.
“Kauza oituan husi nee (la hanorin oras 24 por semana), sira nia oras ensinu nian fo hela 18 minimu liu, masimu 24, mais menus husi nee Diretor ka Koordenador haree mos ba eskola Filial sira neebe mak oras seidauk too bele apoiu fali, labele haree mak sentru deit,” hateten Afonso ba STL iha Vila Nova, Sesta (04/04/2025).
Nia sublina, kauza eskola Filial sira neebe enfrenta problema menus profesores, tuir lo-loos Diretor no Koordenador mak observa profesores neebe nia oras hanorin kada semana la too 18-24 iha eskola sentral bele ba apoiu fali eskola Filial hodi prienxe oras ensinu 24 kada semana.
Tanba Governu rekruta no selu salariu kada fulan, hanorin tuir tarjetu oras kada semana determina ona, laos kada semana hanorin deit oras 9 iha prosesu ensinu aprendizajen.
“Ita sei haree koordena diretores ho inspetor eskola sira para atu fo hanoin, atu nunee koloka profesores sira iha sentru laran nee ho diak,” nia argumenta.
Afonso sublina, Servisu Edukasaun Munisipiu Baukau sei halo koordenasaun ho inspetor eskola hodi identifika eskola sentral sira neebe iha profesores no la hanorin tuir oras ensinu nian (24 oras por semana) iha eskola sentral bele apoiu fali eskola filial neebe menus profesores.
Tanba iha ona regras kada profesores tenke hanorin minimu 18 oras no masimu 24 oras kada semana, maibe profesores neebe la kumpri sei muda ba eskola seluk.
“Nee sira muda ba eskola filiais sira, durante nee ita muda, maibe eskola sekundaria ladun, maibe eskola ensinu baziku nee hotu-hotu hanesan nee, maibe nia relatoriu mak seidauk serta,” katak Afonso.
Diretor nee hateten, durante profesores neebe la prienxe oras hanorin kada semana minimu 18 no masimu 24, Servisu Edukasaun Munisipal liu husi inspetor eskola konsege muda profesores sira ba eskola seluk neebe menus profesores, tanba la obsede ba oras ensinu.
Mezmu nunee, Afonso rekonhese eskola sira iha Munisipiu Baukau sei menus profesores, maibe ministeriu sei responde ho fazeadamente.
(tom)
