DILI, STLTIMORLESTE.com – Relasiona ho Eskola Sekundariu Jeral neebe sei menus profesores, Ministeriu Edukasaun (ME) sei responde ho bolsa kandidatu profesores iha Janeiru 2026.
Liafuan nee haktuir husi Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL, Segunda (15/12/2025).
“Eskola neebe menus profesores, sira nee sei responde ho bolsa kandidatu profesores neebe mak agora daudaun hetan hela formasaun, tanba nee asuntu ida nee ami sei responde ho bolsa kandidatu neebe iha. Nee duni komesa Janeiru 2026 ami sei rezolve ho BolsaKandidatu,” nia informa.
Nunee mos Diretor Eskola Sekundariu Jeral 10 de Dezembru Komoro, Manuel Verdial hatete, ba oin sira sei presiza tan professores ba materia rua ou tolu tan, tanba sira nian professores nain rua mak atu tama ba idade reforma ninia. Nee duni sira husu atu aumenta professores nain 8 ou nain 10.
Iha parte seluk Diretor Eskola Sekundariu Jeral no 4 de Setembru Balide, Sergio A.da Cruz afirma, professores nain lima neebe mensiona nee iha tinan 2026, sira tama iha reforma obrigatoriu ninia.
Jornalista: Jacinta Sequeira
Editora: Domingas Gomes
