DILI, STLTIMORLESTE.com – Komisaun G neebe trata asuntu Edukasaun Juventude, Kultura no Sidadania iha Parlamentu Nasional (PN) apoiu desizaun Governu suspende kursu doutoramentu ba universidade sira iha teritoriu laran.
Prezidente Komisaun G, Armando Lopes hatete, nia parte apoiu desizaun governu nian nee atu taka kursu doutoramentu, tanba universidade sira iha teritoriu laran seidauk prienxe rekezitus atu loke kursu refere.
“Nee ami apoiu, tanba aban bainrua kriteria mak manda para o nia diploma nee bele legaliza, kuandu la legaliza S3 mos ita labele halo buat ruma,” hatete Prezidente Komisaun G, Deputadu Armando Lopes ba jornalista sira iha resintu PN, Kinta nee (15/05/2025).
Nia hatutan, Governu laos taka permanente kursu doutoramentu, maibe taka provizoriu deit aban bainrua wainhira universidade prienxe rekezitus mak Governu bele halo avaliasaun hodi autoriza loke hikas kursu nee.
“Laos taka doutoramentu, nee aban bainrua ita bele loke kuandu prienxe ona rekezitus, profesor hira mak iha ona iha kada universidade para prienxe ona rekezitus hodi ita bele loke fila fali,” dehan nia.
Nia dehan, Timor Leste iha kooperasaun ho nasaun barak, tanba nee universidade sira iha Timor Leste tenke hanoin ona oinsa haruka dosente sira foti kursu iha area doutoramentu, nunee aban bainrua bele prienxe kriteria neebe mak iha.
“Ita iha kooperasaun bilateral no nasaun Indonezia nomos nasaun seluk bele apoiu malu nunee ita nia dosente sira bele ba mestradu no doutoramentu, maibe kuandu seidauk bele ita labele loke, ita labele obriga aan, tanba baibain kriteria ba universidade atu loke kursu doutoramentu nee pelumenus ita nia profesores nee tenke iha ona ema nain 6 lae 7, prienxe tiha kriteria mak bele loke, nee rekezitus,” dehan nia.
(alb)
