DILI, STITIMORLESTE.com – Too agora Eskola Baziku Sentral (EBC – sigla portugues) Manleuana kestiona menus sala aprendizajen ba estudante sira, no sira hatama ona proposta ba Ministeriu Edukasaun (ME).
Asuntu nee hatoo husi Diretor Ensinu Baziku Sentral Manleuana, Carlos Correia ba STL iha nia knar fatin Maleuana, Tersa nee (15/10/2024).
“Difikuldades neebe mak ami hasoru, primeiru mak ami nian sala aprendizajen menus, seidauk sufisiente ba ami atu akomula estudantes neebe ami fahe ba turnu tolu, maibe nuudar diretor eskola hau hatama ona proposta ba iha Edukasaun Munisipiu ba ona nasional, nee ita agradese, posibilidade tinan oin atu halo ami nian edifisiu iha kotuk nee ba halo andar para bele aumenta ami nian sala aprendizajen ba ami nian estudante sira, tanba ami iha sala aprendizajen 14 deit, nee seidauk sufisiente ba ami,” nia informa.
Nia afirma, sala neebe daudaun estudantes sira uza nee hamutuk 14, nee seidauk sufisiente ba estudante sira, tanba eskola ida nee fahe ba turnu tolu, dader, meudia no loraik, ho ida nee ba oin sira presiza atu aumenta sala aprendizajen ba estudante sira, tanba kada tinan numeru estudantes kontinua aumenta.
Iha fatin hanesan, Diretor Edukasaun Munisipiu Dili, Sabino Perreira hatete, eskola neebe sei menus sala aprendizajen nee sei rezolve fazeadamente, laos atu revolve dala ida deit, nee ita rezolve ida por ida, tanba hatene katak, too agora eskola balun sei menus sala ba estudantes sira.
“Ita haree ba orsamentu 2025, ME iha ona planu, liu-liu atu haree kona-ba eskola neebe iha kondisaun sala de aula neebe mak sei menus, buat sira nee mak ita sei hadia, maibe ita labele halo milagre,” nia dehan.
Entretantu, Diretor Diresaun Nasional Infransturtura no Edukativu iha ME, Helio Lopes hatete, tanba nee halo prioridade hirak nee fazeadamente, moru talves ba tinan sira tuir mai, no agora konsentra ba fasilidade importante sira hanesan sala aula, haris fatin, instalasaun bee moos, sala profesor, iha kondisaun neebe minimu molok hakat ba konstrusaun moru.
(jac)
