BAUKAU, STLTIMORLESTE.com – Implementasaun Programa Merenda Eskolar iha Munisipiu Baukau nakonu ho produtu importadu sira.
Diretor Servisu Munisipal Edukasaun Baukau, Afonso dos Santos da Costa hateten, tuir menu hahan ba iha implementasaun programa merenda eskolar neebe aprova husi Ministeriu Edukasaun fo prioridade ba produtu lokal 75% no 25% produtu importadu iha programa refere, maibe implementasaun programa merenda eskolar nee iha Munisipiu Baukau, ekipa jestaun programa tenke halo kompras makaas ba produtu importadu sira hodi tein ba estudante benefisiariu sira komsumu iha eskola, tanba produtu lokal iha Munisipiu Baukau menus.
“Koalia kona-ba menu hau hanoin ita atu tarjetu ba 75% nee susar, tanba produtu lokal nee mak menus, entaun ita uza kahur ho importa mai nee barak liu,” hateten Afonso dos Santos da Costa ba STL iha nia knaar fatin Vila Nova Baukau, Sesta (27/02/2026).
Nia sublina, produtu importadu barak liu neebe mak inklina iha programa merenda eskolar iha Baukau mak hanesan foos, mina tein, masin, manu tolun no seluk tan.
Nia fundamenta, husi produtu lokal neebe mak menus iha Baukau, Servisu Munisipal Edukasaun Baukau esforsu atu reduz tein foos importadu ba estudante benefisiariu sira, maibe la konsege tanba foos lokal iha Baukau folin karun.
“Ita nia foos lokal nee folin karun liu kompara ho ema nia importa mai, ema nia US$ 17 ita nian ba US$ 20 resin, entaun ita nia osan merenda eskolar la kobre ida nee mak nia difikuldade. Nee fo impaktu ba mata dalan programa merenda eskolar nian, maibe ita esforsu nafatin,” Afonso komenta.
Nia katak, tuir informasaun neebe rekolha razaun foos lokal folin karun, tanba numeru produsaun menus, maibe Governu liu husi Autoridade relevante daudaun esforsu ona konstrui irigasaun inklui normaliza irigasaun kanaliza bee ba natar no bainhira iha rezultadu diak, programa merenda eskolar iha Baukau liu liu foos sei utiliza deit foos lokal, maibe tenke ho presu baratu.
Programa merenda eskolar ba anu letivu 2026 iha Munisipiu Baukau hahu iha loron 20 Janeiru no para iha loron 26 Janeiru no daudaun nee kontinua fali ona.
Entretantu implementasaun programa merenda eskolar iha Munisipiu Baukau ho valor orsamentu US$ 2,788,690 fo benefisiu ba estudante 34.614 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu sira, no ninia implementasaun mantein ho regras tinan 2025 nian.
(tom)
