BAUKAU, STLTIMORLESTE.com – Implementasaun programa merenda eskolar iha Munisipiu Baukau sei kontinua fila fali iha fulan Fevereiru 2026.
Diretor Servisu Munisipal Edukasaun Baukau, Afonso dos Santos da Costa rekoinhese, implementasaun programa merenda eskola iha eskola Ensinu Baziku Filial Primeiru, Segundu no Terseiru Siklu Buruma, aliende mos iha eskola seluk daudaun nee paradu, tanba orsamentu ba implementasaun programa refere utiliza deit husi orsamentu restu tinan fiskal 2025 nian hamutuk rihun US$ 70 ba loron 5 nian, hahu iha loron 20 Janeiru 2026 no termina iha loron 26 Janeiru 2026, maibe ekipa prepara ona atu kontinua.
“Ita hatama hotu ona pedidu agora hein aprovasaun agora Janeiru, Fevereiru ita kontinua fali ona,” Afonso hateten iha Vila Nova Baukau, Kinta (29/01/2026).
Nia komenta, preparasaun ba programa merenda eskolar ekipa husi Servisu Munisipal Edukasaun Baukau submete ona pedidu orsamentu ba Autoridade Munisipal neebe daudaun iha ona meza Prezidente Autoridade Munisipiu Baukau, tanba nee bainhira Prezidente Autoridade asina ona pedidu orsamentu ba programa refere mak Ekipa Jestaun Programa sei foti osan iha banku halo kompras hodi kontinua fo han estudante sira iha nivel eskola sira neebe sai benefisiariu ba programa refere.
Tanba nee husu eskola sira pasiensia hein rezultadu husi pedidu neebe submete ona ba Prezidente Autoridade Munisipiu Baukau.
“Se Prezidente Autoridade asina ona ita transfere ba ekipa nia konta bankaria sira ba belanja ita implementa fali ona, nia orsamentu nafatin US$ 2 milhões,” Afonso informa.
Entretantu implementasaun programa merenda eskolar iha Munisipiu Baukau ho valor orsamentu US$ 2,788,690 fo benefisiu ba estudante rihun 34.614 husi eskola sira kompostu Pre-Eskolar, Ensinu Baziku Primeiru, Segundu no Terseiru Siklu sira, no ninia implementasaun mantein ho regras tinan 2025 nian.
(tom)
