DILI, STLTIMORLESTE.com – Implementasaun programa merenda eskolar iha eskolar sira Munisipiu Likisa lao normal hanesan baibain.
Direitor Servisu Edukasaun Munisipiu Likisa, Julio da Silva hatoo lia hirak nee ba jornalista STL liu husi telefone, Sesta nee (18/07/2025).
“Hau hanoin programa merenda eskolar iha Munisipiu Likisa lao diak hanesan baibain, maske eskola sira iha Dili nian mak programa nee paradu hela, maibe ami nian iha Likisa lao diak hela, ami nian estudantes sira kada loron asesu ba programa nee lao diak hanesan baibain, tanba nee EJP sira halao sira nian knaar iha eskola idak-idak lao diak hela,” nia deklara.
Julio hatutan, maske merenda eskolar iha eskola sira Munisipiu Dili ninia paradu, maibe ninia eskola sira iha Likisa, estudantes sira asesu merenda lao diak, maske daudaun nee iha faze ezame segundu periodu, maibe estudantes sira kontinua asesu ba programa nee.
“Ami nian estudantes sira loron-loron asesu ba iha programa merenda eskolar iha eskola no programa nee rasik jere husi ita nian grupu EJP sira, tanba sira mak prepara hahan ba ita nian estudantes sira iha eskola idak-idak,” nia dehan.
Iha fatin seluk, Belchior Maria Almeida Barros hanesan Xefe Departamentu Programa Merenda Eskolar iha Ministeriu Edukasaun hatete, implementasaun Q3 nian ba Munisipiu Dili hetan ona aprovasaun hotu, agora ninia prosesu nee mak agora sei hein hela, husi parte finansas ninia halo transferensia orsamentu ba iha konta EJP sira nian, purtantu horseik sira halo hela koordenasaun, husi esplikasaun neebe responsavel finansas Munisipiu Dili nian katak, se karik semana ida nee orsamentu tama, sira haree oinsa mak atu hein too fulan Agostu mak foin bele realiza.
“Semana oin eskola feriadu, tanba ida nee mak programa merenda eskolar ba Q3 ninia Munisipiu Dili sei lao iha fulan Agostu nia laran, merenda eskolar iha Munisipiu hotu-hotu lao hanesan baibain, ami hetan ona informasaun ikus neebe ohin hau hetan husi Bobonaro katak, ba Q3 nian orsamentu foin tama iha konta bankaria EJP sira nian horiseik,” nia komenta.
Nunee mos Diretor Ensinu Baziku Sentral (EBC – sigla português) Manleuana, Carlos Correia dehan, kuaze besik semana rua ona programa merenda eskolar paradu too agora, tanba osan ba implementasaun merenda eskolar seidauk sai no estudantes sira labele asesu ba iha programa merenda eskolar, no sei hein orsamentu ba programa refere.
(jac)
