DILI, STLTIMORLESTE.com – Oras nee daudaun implementasaun programa merenda eskolar iha Munisípiu tolu (3) mak hanesan Ainaro, Likisa no RAEOA paradu.
Liafuan nee haktuir husi Xefe Departamentu Programa Merenda Eskolar iha Ministeriu Edukasaun, Belchior Maria AlmeidAlmeida ba STL, Kuarta (05/11/2025).
Nia dehan, kona-ba merenda eskolar agora daudaun lao hela, maibe munisipiu neebe paradu tanba sira nian ezekusaun orsamentu mak la sufisiente ona.
“Munisipiu Likisa mak hotu ona, tanba sira nian ezekusaun nee hahu iha Janeiru, sira nian orsamentu la sufisiente no hotu. Iha Oekusi mos agora paradu, munisipiu sira seluk nee normalmente merenda eskolar lao hanesan baibain. Munisipiu Ainaro mos daudaun nee paradu hela, tanba sira nian orsamentu la sufisiente too iha Novembru,” nia esplika.
Nia dehan, iha munisipiu seluk nee merenda eskolar lao hanesan baibain sei too dia 21 Novembru, tanba ensinu aprendizajen too deit dia 21 fulan nee. Likisa para iha Setembru, Ainaro para iha inisiu Outobru no RAEOA nia ezekusaun nee primeiru periodu nian nee gasta hotu ona.
“RAEOA nian ba segundu transferensia nian mak sira iha hela problema oituan, tanba husi finansas RAEOA nian seidauk halo transferensia ba konta bankaria eskola ninia. Hau hanoin Ainaro ninia ezekusaun nee hahu iha Fevereiru tinan nee, Likisa iha Janeiru, RAEOA hahu iha fulan Abril,” nia haktuir.
Nunee mos Direitor Servisu Edukasaun Munisípiu Likisa, Julio da Silva dehan, los duni katak, implementasaun programa merenda eskolar iha Likisa ninia ezekusaun remata ona, tanba osan ba programa nee hotu ona.
Jornalista: Jacinta Sequeira
Editora: Domingas Gomes
