AMBENO, STLTIMORLESTE.com – Merenda eskolar iha Rejiaun Administrativa Espesial Oecusse-Ambeno (RAEOA) seidauk lao tanba sei iha prosesu no daudaun iha ona parte finansas.
“Kona-ba merenda eskolar, ami iha Departamentu Apoiu Asaun Sosial Eskolar Diresaun Rejional Edukasaun no Solidariedade Sosial (AASE-DRESS) Rejiaun Administrativa Espesial Oecusse-Ambeno. Iha prosesu nee, fulan kotuk, ita hatama ona pedidu nee ba Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, ita iha Oecusse laos hanesan munisipiu seluk para halo tenderizasaun, maibe ita halo nafatin pedidu lao nafatin tuir manual tuan nomos adapta manual foun hodi ajusta malu ho Ministeriu Edukasaun ninian no menu merenda eskolar kontinua lao nafatin, tanba nee despaixu PA hatun tiha ona ba iha DRESS no tama ona ba parte finansas hodi bele halo kabimentasaun,” dehan Diretor Rejional Edukasaun no Solidariedade Sosial (DRESS), Vincencio Cono ba STL iha Oecusse, Kuarta (04/03/2026).
Iha sikun seluk, Koordenador Eskola Bazika Filial (EBF) Lamasi foho, Suku Beneufe, Postu Administrativu Nitibe Oecusse, Nunee mos Koordenador EBF Lamasi, Lasarus Bakun Sila dehan, kona merenda eskola, prepara ona fatin hodi nunee fornese aihan ba labarik sira iha nee, maibe foin lalais nee eskola ida nee ameasa monu tanba rai halai, entaun prepara hela fatin provizoriu hodi halao prosesu aprendizajen inklui mos fatin hodi tein aihan, atu fornese ba oan sira.
“Ami nia fatin, foin lalais nee simu ona orientasaun husi DRESS liu husi AASE atu hahu ona programa merenda eskolar, maibe dadaun nee edifisiu eskola nee mos besik atu monu ona tanba rai halai, entaun proviziriu harii eskola iha sorin neeba hodi prosesu aprendizajen lao nafatin inklui merenda eskola bele lao nafatin, tanba dadauk nee merenda eskolar seidauk realiza, dala ruma semana oin maka foin hahu,” dehan Lazaru.
Tuir observasaun STL iha Oecusse, kuaze eskola hotu seidauk simu programa merenda eskolar iha tinan 2026, hahu husi fulan Janeiru too Marsu, estudante sira seidauk simu aihan loron-loron iha eskola.
(jos)
