DILI, STLTIMORLESTE.com – Iha merenda eskolar, ikan, sosis no ayam potong la fo ba estudantes sira han, maibe estudantes han deit naan karau, koto, modo tahan, aifuan no seluk tan.
Lia hirak nee hatoo husi Diretor eskola baziku Central (EBC) Manleuana, Carlos Correia ba STL iha nia knaar fatin Manleuana, Tersa nee (13/05/2025).
“Ohin sira foin ba foti osan, kona-ba menu merenda eskolar, ayam potong, sosis ho ikan nee la tama iha menu merenda eskolar, nee ita la fo estudantes han ida, ami lori loron aifuan, loron Segunda nee estudantes han bifi ho modo tahan, Tersa etu ho manu tolun, Kuarta koto ho repolhu ho naan, konta mos hanesan naan nafatin, tanba nee ikan, ayam potong no sosis nee ita la fo estudantes sira,”bdehan nia.
Nia dehan, total estudantes neebe asesu ba programa merenda eskolar hamutuk 1.888, total profesores iha EBC Manleuana hamutuk 50.
Nunee mos Koordenador EBF 5 Komoro, Marcelino Moniz dehan, menu nee semana ida, tuir nia menu loron-loron la hanesan, ayam potong, ikan sira nee la uza ida,nnaan karau deit mak tama iha menu, manu tolun iha.
“Sosis, ayam potong no ikan nee la tama iha menu merenda eskolar, ita nian estudantes han koto, modo tahan, 2.208 estudantes mak asesu ba programa merenda eskolar, nee dadus bazeia ba 2025 ninia mak nee, profesores 55, maibe balun moras no ativu nee 50,” katak nia.
(jac)
