BAUKAU, STLTIMORLESTE.com – Relasiona negosiante sira kestiona Merkadu Munisipal Baukau kondisaun la seguru, Prezidente Autoridade Munisipiu Baukau Veneranda Lemos hatan labele halo milagre.
Iha loron 23 Janeiru 2026 Autoridade Munisipal Baukau liu husi ekipa Jestaun Merkadu muda negosiante hamutuk 36 iha eis merkadu Vila Antiga ba merkadu Munisipal Baukau. Iha ambitu muda negosiante nee, negosiante sira kestiona kondisaun merkadu munisipal, tanba la seguru ba negosiante sira atu utiliza halao atividade negosiu iha merkadu refere.
“Ita labele halo milagre, uluk mos aat liu ida nee, merkadu ida uluk nee saida mak diak iha neeba, pior,” Veneranda hateten ba STL iha edifisiu Servisu Administrasaun Autoridade Munisipal Baukau, Segunda (26/01/2026).
Mezmu nunee, Prezidente Autoridade Munisipiu Baukau nee rekonhese kondisaun merkadu munisipal sei falta kondisoens lubuk ida neebe atu kompleta, maibe prezisa ho pasiensia hein, tanba Autoridade Munisipal nafatin hamutuk ho Governu Sentral atu hadia fazeadamente.
Tanba nee husu negosiante sira atu nafatin kopera ho Autoridade Munisipiu nunee foku hodi hadia no kompleta kondisoens sira neebe sei falta.
“Agora dehan halo milagre hau laos Maromak nee, nian feto deit sei husu ba nia oan Jesus mak halo milagre, be hau husu ba se halo milagre neebe ita kopera malu,” katak Veneranda.
Eis deputada nee komenta, kona-ba Autoridade Suku Bahu neebe oferese resintu sede Suku Bahu nian ba negosiante Sira utiliza ba atividade negosiu, Autoridade Munisipal orienta ona ekipa konjunta atu haree asaun neebe akontese, tanba Autoridade Suku prezisa hamutuk ho Autoridade Munisipal atu estabiliza no garante sustentabilidade Munisipiu nian ba komunidade tomak.
Tanba bainhira iha Autoridade no sidadaun ida la kopera sei la lori sidade Baukau ba sidade seguru, tanba bainhira sidade sabraut Baukau sei la hakat ba dezentralizasaun.
Nunee husu negosiante sira atu kopera iha prosesu muda merkadu, tanba prosesu ba konstrusaun merkadu Munisipal prepara ona husi Ministeriu Turizmu no Industria no bainhira projetu refere implementa sei fo benefisiu ba negosiante sira.
“Neebe foin lalais tekniku sira husi Ministeriu nian mai koalia ona ho Autoridade ita prezisa hatudu deit estrada ida tama sai para kareta boot sira lori material boot sira atu nunee sira labele uza fali estrada ida agora iha merkadu nee, se lae ita iha perturbasaun ba transporte no trafiku, neebe ami koalia ona maibe hau la hatene bainhira mak sira hahu,” Veneranda hakotu.
(tom)
