LAUTÉM, STLTIMORLESTE.com – Kondisaun merkadu iha Postu Administrativu Lospalos dezorganizadu, tanba kondisaun la permite no ijeniku ba negosiante sira atu faan sasan.
“Ita haree kondisaun merkadu iha Postu Administrativu Lospalos sai sentru ba Postu
Administrativu, suku no aldeia sira iha Munisipiu Lautém tomak, tantu negosiante sira husi Munisipiu Baukau mos mai faan sasan hotu iha Lospalos, entaun fatin la permite, halo negosiante sira laiha espasu dignu ba sira atu faan sasan,” dehan negosiante iha merkadu Lospalos, Anita dos Santos Pinto ba STL iha merkadu Lospalos, Kinta nee (09/01/2025).
Merkadu Lospalos tuir Anita sai fatin ida neebe ema hotu mai faan no sosa sasan, maibe espasu ba negosiante sira atu faan sasan laiha, tanba komunidade balu uza fatin merkadu sai rezidensia privadu, signifika merkadu sai dezorganizadu.
Tanba durante nee autoridade relevante sira halo reabilitasaun ona ba merkadu, oinsa bele halo espasu merkadu sai konduzivel, hodi negosiante sira ba faan sasan hanesan produtu lokal sira ho efisiente, maibe agora merkadu sai fali fatin permanente ba komunidade no negosiante sira hodi hela.
Iha sorin seluk, Negosiante Maria Soares Gonzaga dehan, kondisaun merkadu Lospalos laiha duni espasu dignu ba negosiante sira atu faan sasan, tanba areador merkadu refere sai fatin ba komunidade no negosiante seluk hodi hela no sai nudar fatin privadu, entaun negosiante faan la tuir nia fatin, halo merkadu sai dezorganizadu.
Tanba uluk merkadu sai merkadu neebe limpu no ijiene, organizadu liu ba negosiante sira hodi faan sira nia produtu lokal, maibe agora uza merkadu refere sai fatin rezidensia permanente, entaun laiha espasu ba komunidade liu-liu negosiante sira hodi faan sira nia sasan.
Aleinde nee Administrador Postu Administrativu (APA) Lospalos, Olderiku Quimbra hateten, kondisaun sentru merkadu Lospalos, daudaun nee planeia ona hamutuk ho lider komunitariu iha Suku Fuiloru katak, iha tempu badak nia laran sei halo aprosimasaun ho vendedor sira neebe halao atívidade negosiu iha merkadu Lospalos.
Tanba iha merkadu refere baraka nakonu ona iha estrada ninin, entaun prejudika ba movimentasaun no transporte publiku sira, nunee presiza duni aprosimasaun ba vendedores sira neebe faan sasan la tuir nia fatin, tuir lo-loos fatin merkadu ida nee atu utilija hodi halo negosiu, laos ba halo rezidensia, ida nee fo imajen neebe la diak ba ema hotu.
(EST 1)
