DILI, STLTIMORLESTE.com – Kondisaun Merkadu Taibesi ho Manleuana presiza hadia no reabilita hodi dezenvolve ho modernu, tanba merkadu nasional sira nee kondisaun la diak.
“Ita haree merkadu nasiona Taibesi-Manleuna kondisaun la diak, tanba espasu ba negosiante, transporte publiku sira, hanesan karreta no motor laiha, produtu neebe faan mos la tuir nia fatin, tanba nee husu ba Governu atu hadia no dezenvolve ho modernu,” dehan Diretor Ezekutivu husi Asosiasaun HAK, Felisiano da Costa de Araujo ba STL iha nia knaar fatin, Farol, Dili, Kinta (21/11/2024).
Tanba tuir nia esperiensia neebe hetan husi nasaun seluk, merkadu nasional sira tenke kondisaun limpu no sanitariu, presiza mos iha espasu ba ema vendedores ka negosiante sira atu faan sira nia produtu tuir nia fatin,
Realidade merkadu nasional sira iha Timor Leste ho kondisaun neebe inseguru, laiha sanitariu, aloka orsamentu kuaze rihun US$ 1 hodi halo alargamentu ba merkadu rua nee, maibe kondisaun nunka iha mudansa, negosiante sira leba fali sira nia produtu lao ba lao mai iha sidade Dili.
Tuir lo-loos negosiante sira faan produtu lokal tenke tuir nia fatin, maibe realidade oin seluk iha sosiedade, leba produtu lokal sira hodi lao ba buka komprador sira hodi sosa, tanba ho razaun merkadu fatin la dignu, espasu ba vendedor sira laiha, kondisaun sira nee laiha sanitariu.
Entretantu jestor ba merkadu Taibesi, Egenio Pinto afirma, Merkadu Taibesi-Manleuna durante nee Governu halo ona melhoramentu ba kondisaun sira iha laran, liu-liu hadia kondisaun haris fatin, espasu ba trasporta publiku sira, realidade kondisaun sei kloot nafatin, mudansa laiha ba vendedor sira hodi faan sira nia produtu lokal sira, nunee hanesan jestor oinsa orienta vendedor sira faan sasan ka produtu lokal tuir nia fatin.
Aleinde nee husi Xefe Departamentu Jestaun Merkadu Munisipiu Dili, Joaquin Alves hateten, kondisaun iha merkadu nasional sira presiza hadia duni, nunee iha futuru bele sai sentru merkadoria ekonomia ba ema hotu.
(EST 1)
