BAUKAU, STLTIMORLESTE.com – Ministeriu Ensinu Superior Siensia no Kultura (MESCC – sigla português) liu husi Diresaun Nasional Legalizasaun (DNL), disemina rekezitu kona-ba legalizasaun diploma no estabelese institutu ensinu superior ba dirijenti eskola no munisipal sira iha Munisipiu Baukau.
Xefe Departamentu DNL, Luís Aparicio hateten, diseminasaun refere importante, tanba politika Governu lori programa hakbesik nivel munisipiu sira hodi hatene servisu no ezistensia Diresaun Nasional Legalizasaun neebe estabelese husi IX Governu Konstitusional.
“Departementu ida nee simu ema nia diploma sira neebe atu legaliza haree dokumentus sira hotu enkamina ba diretor asina,” hateten Luís Aparicio ba jornalista sira iha Vila Nova Baukau, Kuarta (14/05/2025).
Nia sublina, ezistensia Diresaun Nasional Legalizasaun importante, tanba antes nee iha duni parte legalizasaun, maibe presiza asinatura ikus husi Diretor Jeral Ensinu Superior hafoin ofisializa diploma rekonhese legalizadu, tanba nee estabelese Diresaun Nasional Legalizasaun hodi ofisializa diploma sira.
Tuir partisipante atual Koordenador Eskola Sekundaria Jeral Filial Uailili, Júlio Aniceto Ximenes katak, diseminasaun refere importante no iha valor ba entidades hotu atu komprende, tanba esplika kona-ba legalizasaun diploma rai liur no rai laran.
“Desiminasaun nee importante ba ita sira iha munisipiu atu komprende hodi ba diresaun sira labele lao sala dalan, tanba antes nee seidauk hatene kriteiru sira nee,” hateten Júlio Aniceto Ximenes.
Partisipante nee husu Diresaun Nasional Legalizasaun atu realiza desiminasaun too iha nivel Postu no Suku, nunee sidadaun sira bele intende ezistensia no servisu Diresaun Nasional Legalizasaun, tanba maioria seidauk hatene klean kada diresaun nia servisu neebe fo impaktu ba sidadaun sira bainhira iha nesesidade trata dokumentu.
Entretantu desiminasaun nee realiza bazeia ba despaisu Ministerial Nu.090/Gabineti-MESCC/2020 neebe partisipa masimu husi koordenasaun eskola sira inklui Diretor Servisu Munisipal.
(tom)
