DILI, STLTIMORLESTE.com – Iha loron (19/03/2026), Magno Chanceler Universidade Católica Timorense (UCT) Dom Virgílio Cardeal do Carmo da Silva, SDB hamutuk ho Ministru Ensinu Superior Siensia no Kultura (MESSK), José Honório realiza inagurasaun estátua Dom Alberto Ricardo da Silva (DAR) no fo bensaun laboratoriu MBBS–Indiana, hanesan parte husi esforsu atu hametin kualidade edukasaun superior iha Timor Leste.
Dom Alberto Ricardo da Silva, Bispu Emerito Dili nian, konhese hanesan figura importante neebe durante ninia vida fo apoiu ba desenvolvimentou edukasaun katolica no formasau juventude. Estatua nee reprezenta símbolo inspirasaun ba gerasaun foun atu kontinua valoriza edukasaun no servisu ba nasaun.
Iha tempu hanesan, realiza mos bensaun Laboratorio MBBS–Indiana, neebe sei utiliza hodi suporta prosesu aprendizajen iha area medicina no científicas. Laboratoriu ida nee sei permite estudante sira atu desenvolve abilidade prática no peskiisa, hodi hasae padraun edukadaun iha UCT.
Liu husi diskursu Ministru Ensino Superior hateten, desenvolvimentu infraestrutura hanesan laboratorio importante tebes atu asegura kualidade edukasaun no prepara rekursu humano neebe kompetente ba futuro Timor Leste.
“Laboratoriu MBBS–Indiana sei fo oportunidade boot ba estudante sira atu aprende liu husi pratica direta,” hateten Governante nee liu husi rede sosial Arquidioseze Dili Metropolitana neebe diariu nee asesu iha Sesta (20/03/2026).
Nunee mos Magno Chanceler UCT, Dom Virgílio Cardeal do Carmo da Silva afirma, inaugurasaun estátua no bensaun laboratoriu nee hatudu klaru kompromisiu universidade atu integra valores espiritual ho konhesimentu científico iha prosesu edukasaun.
“Estatua Dom Alberto Ricardo sei sai hanesan inspirasaun ba ita hotu atu kontinua luta ba edukasau no verdade,” dehan Magno Chanceler UCT nee.
Serimonia nee realiza iha Campus UCT, São João Paulo II Balide, ho presença husi lider Igreja Católica, autoridade governo, docentes no estudante sira. Inaugurasaun estátua Dom Alberto Ricardo da Silva sai momento importante ida atu rekonese ninia kontribuisaun boot iha área edukasaun no formasaun espiritual iha Timor Leste.
Evento inaugurasaun nee marca etapa importante ida iha desenvolvimentu UCT, liu-liu iha esforsu atu fornese edukasaun ho kualidade aas neebe integra dimensaun espiritual no científico ba benefísiu nasaun.
(dom)
