DILI, STLTIMORLESTE.com – Tinan nee Ministeriu Ensinu Superior Siensia no Kultura (MESSK) kontinua fo apoiu subvensaun ba universidade privadu sira iha Timor Leste.
Ministru Ensinu Superior Siensia no Kultura (MESSK), Jose Honorio Jeronimo da Costa Pereira hatoo lia hirak nee ba jornalista sira iha salaun Delta Nova, Komoro, Dili, Tersa nee (18/03/2025).
“Tinan ida nee Governu kontinua fo subvensaun ba universidade sira, horiseik ami halo reuniaun ida ho reitores sira hotu iha konselhu reitores, hau informa ba sira katak, atu aposta ba kualidade, ita koalia beibeik Governu nian papel mak liu husi subensaun nee atu ajuda sira, tinan ida nee Governu apoiu ba buat tolu, estudantes, profesores no formasaun ba lingua. Maibe iha institutu balu sira fo hanoin, tanba governu fo subvensaun tinan liu ba, sira halo projetu balu la hotu, hau hatete ba sira hakerek karta ofisial mai, depois ita haree atu bele rezolve situasaun sira nee,” nia dehan.
Nia dehan, Governu kontinua fo apoiu ba sira, montante orsamentu neebe fo apoiu nee hamutuk US$ 2 milhoens resin atu fo ba ensinu superior privadu sira, maibe depende mos sira nian ezekusaun liu, sira tenke hatama relatoriu, sira hatene ona saida mak sira halo, tinan nee kada universidade hetan pur volta rihun US$ 100, balu la too depende ba tenke haree regras balu neebe importante.
Iha fatin neebe la hanesan, Reitor ISC, Sebastião Perreira hatete, sira nian relatoriu foin daudaun hatama hotu ona no la presiza informa ba media ida.
“Ida nee ami la hatene seidauk, programa seidauk iha, nusa mak imi hatene uluk ona, kona-ba relatoriu ami hatama hotu ona, foin daudaun ami hatama tiha ona, la presiza informa ba media ida,” nia esplika.
(jac)
