BAUKAU, STLTIMORLESTE.com – Ministeriu Ensinu Superior Siensia no Kultura (MESSK) liu husi Komisaun Asesu Ensinu Superior desemina regras asesu Ensinu Superior Publiku Universidade Nasional Timor Lorosa’e (UNTL) no Institutu Politekniku Betano (IPB), tinan akademiku 2026 ba entidades sira iha Munisipiu Baukau.
Diretora Nasional Siensia no Teknolojia husi MESSK, Amélia da Silva Araújo esplika, deseminasaun refere bazeia ba diploma MinisterialnNumeru 20/2025 loron 09 Julhu artigu 14 mak MESSK liu husi Komisaun Asesu Ensinu Superior Publiku tinan akademiku 2026 hahu halao rejistu ba kandidatu rejime espesial ho nia sub-rejime.
Rejime jeral ba kandidatu neebe remata ona Ensinu Sekundaria Jeral no Ensinu Sekundaria Tekniku Vokasional iha tinan akademiku 2025 neebe sei tuir Exame Nasional husi Ministeriu Edukasaun. Inklui melhor estudante hamutuk nain 66 husi Ensinu Sekundaria Jeral no Ensinu Sekundaria Tekniku Vokasional.
Rejime Espesial iha sub-rejime 16 kompostu, oportunidade, vetetanu, veteranu no martire nia oan, habiit, kandidatu sira ho difisiensia fizika no sensorial komprovadu, pratikante desportista, kandidatu neebe remata ona Ensinu Sekundaria iha eskolar Internasional sira iha TL, sidadaun Timor oan neebe remata Ensinu Sekundaria iha rai liur, sidadaun estranjeiru neebe remata Ensinu Sekundaria, Diplomata Timor Oan ninia familia, Diplomata estranjeiru neebe halao servisu iha Timor ninia familia, kandidatu neebe remata ona kursu Ensinu Superior, Kandidatu idade liu 23 la remata Ensinu Sekundaria no, Ofisial Permanente husi PNTL no F-FDTL.
Area estudu neebe bele asesu iha UNTL no IPB mak hanesan Fakuldade Agrikultura, Siensia Exatas, Siensia Sosiais, Edukasaun Humanidades, Direitu, Engenharia Siensia Teknilojia, Medisina Siensia Saude, Turizmu Arte no Kulturais, Jestaun Ekonomia no Fakuldade Filosofia. Enkuantu IPB superior Enjinharia no Agronomia Zooteknika.
Rejistu simu kandidatu foun sei hahu iha loron 27 too 31 Outubru 2025 no kontinua realiza exame ba kandidatu sira mak hanesan, area Siensia Teknolojia realiza iha loron 02 Dezembru 2025, area Siensia Sosiais Humanus loron 03 Dezembru no loron 04 Dezembru 2025 realiza exame ba Kandidatu sira husi eskola Tekniku Vokasional neebe sei realiza iha Servisu Edukasaun Munisipal idak-idak.
“Partisipante mai husi Nai Xefe Suku sira, husi PNTL no Forsa, Diretur no koordenador eskola sira, deseminasaun ida nee atu habelar informasaun nee ba area rural sira nee para labarik sira iha preparasaun rejime rua neebe hau temi,” hateten Amélia ba jornalista sira iha salaun INFORDEPE Vila Nova Baukau, Tersa (16/09/2025).
Nia sublina, deseminasaun refere introduz prosesu sira ba Lideransa Komunitariu, Autoridade Postu, Diretor no Koordenador Eskola sira atu intruduz tutan ba estudante sira iha area remotas prepara aan hodi kompete oportunidade refere.
Nia fundamenta, deseminasaun refere realiza bazeia ba diploma Ministerial numeru 20/2025 loron 09 Julhu iha artigu 05 selebra koordenasaun ho linhas ministerial liu liu Ministeriu Asuntu Kombatentes Libertasaun Nasional, Edukasaun, Solidariedade Sosial no Inkluzaun atu habelar informasaun ba estudante sira kompete oportunidade ba Universidade Publiku hanesan UNTL no IPB.
Iha fatin hanesan Sekretariu Jeral Konselhu Kombatentes Munisipiu Baukau, Manuel da Costa Soare “Alari” konsidera deseminasaun refere importante, tanba fahe informasaun ba entidades sira atu kontinua intruduz ba estudante sira hodi kompete iha oportunidade refere, maibe husu MESSK atu haree fila fali rejime espesial ba veteranus sira nia oan.
“Husu ba Ministeriu Ensinu Superior se bele karik haree fila fali rejime espesial ba veteranus sira nia oan hanesan tinan tinan ami koalia tau ba ba Konselhu Nasional atu halo dezisaun ida kona-ba veteranus nia oan neebe hetan rejime espesial nee halo balansu,” Alari rekomenda.
Sekretariu Jeral Konselhu Kombatentes Munisipiu Baukau nee rekomenda ba MESSK atu halo balansu ba vaga rejime espesial neebe fo ba estudante veteranus oan sira, tanba durante nee teste fo valor elimina veteranus balun nia oan la partisipasaun iha oportunidade refere.
Enkuantu Xefe Suku Guruça Filomeno Mendonça promete sei intruduz informasaun refere ba estudante sira iha Suku Guruça, Postu Administrativu Kelikai Antigu prepara aan hodi kompete iha oportunidade refere.
“Deseminasaun ida nee importante ba ami lideres komunitariu atu asesu informasaun tuir teste universidade sira. Liu husi deseminasaun ida nee pasa informasaun ba ami nia juventude sira neebe agora iha Ensinu Sekundaria hatene kalendariu ba teste nee rasik,” katak Filomeno.
Entretantu deseminasaun nee realiza iha salaun INFORDEPE Vila Nova Baukau hetan partisipasaun masimu husi lideransa komunitariu, autoridade postu, Diretor no Koordenador eskola inklui Autoridade Komando Polisia Munisipiu Baukau no Komponente Terrestre Lanud Baukau.
Jornalista: Tomas Reis
Editora: Domingas Gomes
