DILI, STLTIMORLESTE.com – Ministru Ensinu Superior Siensia no Kultura (MESSK), José Honorio da Costa Pereira dehan, labele uza kampus sai fali hahalok aat hodi la respeita feto sira, tanba nee husu ba edukador no estudante mane sira, presiza respeita feto sira.
“Labele uza kampus sai fali hahalok aat neebe la respeita feto sira, favor boot ida, husu estudante mane sira, tantu profesor no edukador sira hotu respeita alin feto sira,” hatete Ministru Ensinu Superior Siensia no Kultura (MESSC), José Honorio da Costa Pereira ba jornalista sira, hafoin inaugura edifisiu Fundasaun Cristal, iha salaun Cristal Balide, Kuarta (8/10/2025).
Nia mos apelu ba profesor sira relasiona ho kazu iha UNTL asediu seksual, nia asina ona memoramdum ida ho UN WOMEN kona-ba asediu seksual, kampus nee tenke seguru ba estudante no professor sira, ida nee importante tebes.
Nia akresenta, wainhira laiha feto, ohin loron nia labele sai Ministru no labele sente mundu nee nia furak
“Hau nia intervensaun sira dehan, sei laiha feto sira ohin hau labele sai ministru no hau labele haree Timor nee nia furak, tanba nee hanesan ministru, hanesan sarani ida, dala ruma Domingu ba misa, mas ita nia hahalok sira ita halo nee la reflete, ita hanesan ema kristaun ida,” afirma nia.
Nia akresenta, sosiedade ohin loron mosu buat barak, ema nunka respeita feto sira, tanba nee favor boot ida respeita alin feto sira, ita prepara sira ba futuru lider ba ita nia nasaun nee.
Jornalista: EST 1
Editor: Xisto Mendonça
