DILI, STLTIMORLESTE.com – Ministeriu Ensinu Superior Siensia no Kultura (MESSK) nafatin halao kontrola ba universidade sira, hodi haree dosentes ho grau lisensiatura neebe hanorin iha universidade.
Dehan Ministru Ensinu Superior Siensia no Kultura (MESSK), Jose Honorio Jeronimo da Costa Pereira ba STL, Kuarta nee (19/03/2025).
“MESSK halo hela kontrolu, obriga sira nafatin, maibe ita labele hatete dehan kuaze dosentes sira hanorin iha instituisaun sira nee kuaze maestradu, nível lisensiatura oituan deit, maibe hau hatete ona ba sira katak, kontinua promove para too loron ida profesores sira neebe hanorin iha universidade sira ho grau maestradu barak,” dehan nia.
MESSK husu atu instituisaun superior sira hotu oinsa mak haruka nafatin sira nian estudu hasai nível grau akademiku, maibe dosente sira neebe mak hanorin iha ensinu superior sira nee barak mestradu ona.
Iha fatin seluk, Mateus Maia de Jesus hanesan Reitor EAST Timor Coffee Institute (ETCI) dehan, dosente neebe mak agora daudaun hanorin iha ETCI nee mestradu no doutoramentu no balu haruka sira ba kontinua sira nian estudu.
Entretantu Reitor ISC, Sebastião Perreira hatete, ISC nafatin haruka ninia dosentes sira ba kontinua estudu tantu iha rai liur no rai laran, tanba dosente lisensiatura neebe mak iha nafatin haruka sira kontinua estudu.
(jac)
