DILI, STLTIMORLESTE.com – Ministru Interior (MI), Francisco da Costa Guteres apela ba sidadaun hotu-hotu atu koopera ho autoridade seguransa hodi evita hatudu komportamentu destrutivu nomos hatudu imajen diak durante eventu jogu Comunidade dos Países de Língua Portuguesa (CLPL) nian.
Ministeru Interior Francisco da Costa Guteres nia mensajen apela nee transmite husi Portavos Seguransa Ministeriu Interior (MI), Superiendente Polisia João Belo dos Reis ba jornalista sira liu husi konferensia imprensa iha edifisiu Ministeriu Interior, Vila Verde, Kinta nee ( 24/07/2025).
Liu husi Portavoz Seguransa MI nee informa, Ministru Interior hatoo motivasaun no apresiasaun boot ba joven sira kona-ba partisipasaun iha eventu desportiva CPLP ne’ebe halao ho dignu no orgulhu ba TL nuudar nasaun membru CPLP.
Nia esplika, Ministru mos konsidera katak, atividade jogu desportivas CPLP nee laos deit kompetisaun iha area desportivas, maibe mos plataforma ida neebe atu reforsa ligasaun fraternal, promove kultura no pas no unidu TL ho nasaun seluk iha mundu.
Tanba nee, Governante nee apela ba sidadauun hotu-hotu, liu-liu adeptus sira atu bele kontribui ba eventu importante nee bele lao ho susesu no orgulhu ba nasaun CPLP no mos nasaun sira seluk tan.
“Husu atu sidasaun sira partisipa ho dignu no espiritu solidariedade iha eventu nee,” nia deklara.
Nunee mos Ministru Interior nee husu atu sidadaun hotu-hotu hatudu imajen diak TL ba vizita sira husi nasaun membru CPLP liu husi atensaun, respeitu no solidariedade.
“Persiza mos sidadaun hotu-hotu koopera ho autoridade seguransa, fo kontribuisaun hodi organiza no seguransa ba eventu ne’e ho diak,” nia koalia.
Aleinde nee, membru Governu nee mos husu ba sidadaun sira atu evita atu hatudu komportamentu destrutivu hanesan, violensia, lanu, diskriminasaun no propaganda negativu.
Enkuantu, nia mos husu ba sidadaun hotu-hotu atu aproveita momentu nee atu aprende, partilha kultura no hadia relasaun ho joven sira hosi nasaun CPLP no nasaun seluk.
“Apelu nafatin ba inan-aman sira atu kontinua kontrola no orienta oan sira, evita atu iha evenvolvimentu krimi droga no kazu violensia,” nia hatutan.
Nia informa, iha Dili laran no munisipiu sira kazu ema naok motor, telefone barak, nunee husu ba sidadaun hotu atu labele hola motor neebe dokumentus laiha, tanba nee deskonfia rezultadu husi krimi naok ou kontra bandu,” nia apela.
Entretantu Autoridade Seguransa husi nivel aldeia too Kapital Dili iha responsavel koletivu hodi garante TL nia seguru no harmonia.
Antes nee Segundu Komandante Jerál Polísia Nasionál Timor Leste (PNTL), Komisariu Polísia Pedro Belo apresia Seguransa PNTL Asegura abertura jogu Desportu Eskolar CPLP epoka 2025 iha Estadiu Munisípal Dili lao diak ho susesu too agora.
Nia hatutan, iha abertura jogu Desportu Eskolar CPLP epoka 2025, autoridade seguransa PNTL dedika sira nia aan tomak ho sakrefisiu, maske kolen, maibe lao diak too remata.
“Hau apresia tebes seguransa ohin abertura jogu Desportu Eskolar CPLP nee lao diak tebes, hau fo parabens ba imi hotu, maibe karik iha naksala balun ita hadia no aban nian nomos ita kontinua asegura atividade jogu Desportu Eskolar CPLP epoka 2025 iha Timor Leste tenke lao diak,” nia afirma.
(jen)
