DILI, STLTIMORLESTE.com – Governu liu husi MInisteriu Interior (MI) fo tomada de pose ba kargu Diretor Ezekutivu nomos ba Kargus Diresaun no Xefia iha MI hamutuk 120.
Iha ambitu nee Ministru Interior (MI), Francisco da Costa Guterres akompanha husi Sekretáriu Estadu Protesaun Sivil (APC), Domingos Mariano Reis no Prezidente Komisaun B Parlamentu Nasional, Domingos Augusto “DEKER”, nomos Prezidente Komisaun Funsaun Públiku (KFP), Letêncio de Deus, fo pose ba kargu Diretóra Ezekutiva Servisu Migrasaun, Superintendente Xefi Polisia Natércia Eufrasia Soares Martins no Kargus Diresaun no Xefia Ministériu Interiór hamutuk 120.
Nia dehan, iha serimónia refere MI deseja ba emposadu sira hotu atu halo servisu profisional no funsiona ho diak no responde ba presiza instituisaun ninian.
“Dezeju ba ita boot sira hotu, ba imi nia servisu atu serví povu no ba rai ida nee, husu ita boot sira hotu servisu ho disiplina. Iha tempu neebe mak atu foti desizaun tenki foti, obedese ba regras, atu nunee mákina estadu nee bele funsiona, hau nia hakarak no dezeju mak ita boot sira halao knaar ho diak,” hatete Ministru Interior (MI), Francisco da Costa Guterres liu husi nia deskursu iha Delta Nova, Kinta (12/02/2026).
Nia tenik, tomada de pose nee atu kompleta estrutura Ministeriu Interiór ninian, maske falta balun, pratikamente atu kompleta estrutura, wainhira mákina ida funsiona ho diak mak sei mantein hodi responde ba nesesidade povu no nasaun nian.
Nia husu ba kargu Xefias sira atu servisu makaas kontribui serví ba rai ida nee, servisu ho sériu, kuidadu no responsabilidade, atu nunee bele alkansa objetivu neebe trasa ona, tuir planu asaun anual nian.
“Ida nee mak imi tenki prepara didiak hodi responde ba planu neebe tau ona,” nia deklara.
Iha fatin hanesan, Prezidente Komisaun Funsaun Publika (KFP), Letêncio de Deus fo parabéns ba emposadu sira neebe simu posse hodi kaer kargus Diretora Ezekutivu nomos kargus Xefia sira atu uza knaar ida nee ho didiak para bele atende nasaun no povu ida nee.
“Husu hatudu nafatin imi nia lideransa no imi nia kapasidade durante mandatu, sai inovador lori buat foun ruma hodi halo atendimentu diak liu tan ba komunidade em jeral. Hau dezeju susesu ba imi, hatudu konfiansa ida nee katak imi serve duni atu servisu hamutuk lori ninisteriu ida nee ba oin”, nia afirma.
(jen)
