DILI, STLTIMORLESTE.com – Ministru Interior (MI), Francisco Guterres hatete, atu sai membru Polisia Nasional Leste (PNTL) iha ona kriteria, no opsaun karik hakarak sai Polisia tenke sai husi Grupu Arte Marsiais (GAM).
Ministru Interior Francisco Guterres hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta (07/08/2025).
Kona-ba oknum membru PNTL balun neebe treinu subar hodi sae sabuk iha Indonezia oinsa Ministru nia haree ba ida nee, hatan ba kestaun nee Ministru hatete, atu sai polisia tenke hili opsaun ida, se hakarak mantein tuir GAM sai husi polisia no hakarak polisia tenke sai husik GAM.
“Ema entrevista ona hau dala ida maibe la hatene husi neebe karik, hau dehan sai ba polisia nee mak nee ninia estatutu nee koalia klaru tiha ona katak nia hili deit ida, o polisia o GAM, hotu ona, laiha opsaun rua, opsaun ida deit o hili ida deit hotu ona,” katak Ministru Interior.
Ministru hatete, se hakarak hili tuir GAM mak simu osan diak, diak liu sai husi polisia, tenke hili opsaun ida deit.
“O hakarak polisia o sai husi GAM, se o lakohi sai husi GAM o sai husi polisia, se GAM o manan diak liu karik o lao ba,“ katak nia.
Aleinde nee oras nee daudaun kada Ministeriu halo preparasaun masimu atu Timor Leste bele adere ba ASEAN oinsa Ministeriu nia preparasaun atu adere ba ASEAN? Hatan ba kestaun nee Ministru Interior hatete, “Ami preparadu hela tanba ita halo preparasaun, tanba nee mak ita nia prosesu rekrutamentu nee reforsa kestaun imigrasaun reforsa kestaun Fronteira atu halo kontrola imediatu diak liu tan, ita mos prepara polisia atu ba kualker reuniaun se no kazu akontese depois ita mos prepara,” hatete MI.
Kontinua preparativu nunee bele halo dezenvolvimentu iha rai laran, no agora dadaun prepara hela Forsa para atu kontinua mantein seguransa estavel para dezenvolve greater sunrise nee, tanba ema hotu hakarak greate sunrise nee mai no polisia mos prepara hotu ba ida nee.
Husu mos komunidade hotu atu bele prepara, no jornalista no joven sira mos presiza serbisu hamutuk ho Polisia no forsa para hametin diak liu tan seguransa no establidade.
(eme)
