DILI, STLTIMORLESTE.com – Ministru Interior (MI), Francisco da Costa Guterres apela ba maluk Timoroan sira katak Konselhu Ministru (KM) hasai ona Rezolusaun Governu 54/2025 iha loron 2 Outubru 2025 hodi taka atividade jogu online hotu iha Timor Leste. Tamba nee, kuandu individu ruma sei halao atividade jogu online, nee konsidera ilegal no polisia sei atua.
Portavoz Seguransa Interinu iha Ministeriu Interior, Superintendente-Assistente Polisia, Mouzinho T. Correia hato’o mensajen Ministru Interior nee liuhosi konferensia imprensa neebe halao iha Sala Multimedia Servisu Migrasaun, Ministeriu Interior, Vila-Verde, Dili, Kinta (16/10/2025).
Portavoz Mouzinho Correia neebe akompanha husi Koordenador Gabinete Seguransa ba Ministerio Interior, Moises da Silva no Inspector Xefe Serbisu Migrasaun, Vicente Gusmao, hateten Ministru Interior mos agradese tebes ba maluk Timoroan hotu nia kontribuisaun hodi garante seguransa durante realizasaun atividade despostu Internasional Dili Maratona neebe lao ho diak no laiha insidente ruma neebe prejudika atleta sira.
Liuhosi konferensia imprensa nee mos, Portavoz Mouzinho Correia relata insidente sira neebe akontese iha teritoriu nasional Timor Leste durante semana rua nia laran husi periodu 28 Setembru to’o 12 Outubru 2025 rejista hamutuk 79 insidente.
“Insidente sira neebe numeru as liu iha semana ikus fulan setembru no primeira fulan Outubru 2025 maka violasaun domestika 122, asaltu 34, furtu 9, asaltu seksual 7 no burla 4,” dehan Mouzhino.
Nunee mos kazu seriu sira neebe akontese iha semana 3 — 9 outubru 2025 maka iha 3 Outubru 2025, iha Munisipiu Likisa sidadaun ida ho naran Francisco da Costa Alves (28 anos), mate derepende bainhira deskansa iha Silindru nia laran no iha loron 4 Outubru 2025, sidadaun ida ho naran Leonisio da Costa Belo (22 anos) mate derepende iha kursu SOLS fatin iha Munisipiu Likisa.
Iha loron 7 Outubru 2025, Polisia Nasional Timor Leste (PNTL) Eskuadra Dom Aleixo no Dirasaun Seguransa Investigasaun Kriminal (DSIK) atende kazu deskunfia suisidiu iha area Manleuana, vitima ho naran Cecilia Barros dos Santos (19 anos) hosi Munisipiu Aileu, hela iha Manleuana.
Iha loron 7-8 Outubru 2025, DSIK, Komandu Munisipiu Ainaro, Aileu, Ermera no Likisa realiza operasaun check point hodi passa revista ba motorizada sira neebe deskunfia motor nauk nian. Husi operasaun ida nee, PNTL konsege rekolla motor hamutuk 12 neebe deskunfia motor nauk.
Portavoz Mouzhino Correia mos relata iha semana ikus fulan setembru, DSIK ho Komandu Munisipiu Likisa deskobre atividade krime trafiku umana neebe involve sidadaun estrajeiru nain 10.
“Hosi kazu ida nee, Polisia asegura vitima nain 8 no suspeitu nain rua (2) ho inisial MAH no ASU hetan medida koasaun prizaun preventiva,” katak Mouzinho.
Jornalista: Mikael Mali Mau
Editor: Mikael Mali Mau
