DILI, STLTIMORLESTE.com – Ministru Interior (MI), Francisco da Costa Guterres hatete, daudaun nee Governu hamutuk ho Komando Polisia Nasional Timor (PNTL) diskuti hela atu fo kouta ba feto, tanba nee husu feto kompete iha rekrutamentu membru PNTL neebe sei halao iha tinan ida nee.
Ministru Interior, Francisco da Costa Guterres hatoo lia hirak nee ba jornalista sira, bainhira remata partisipa Seminariu Nasional ba loron Aniversariu PNTL ba dala XXV ho tema “Hamutuk Ita Hametin Konfiansa Polisia Nasional Timor Leste”, iha Sentru formasaun PNTL, Komoro, Dili, Tersa (11/03/2025).
“Ami fo kouta ida ba feto katak proteje feto atu tama, entaun ita boot sira mos tenke enkoraja feto atu tuir, dala barak feto hakarak liu deit labele tenke liu husi kriteria ida, no sai polisia laos hamnasa maibe regra mak manda, katak feto tenke halao servisu polisia nia forte ka lae halai, hamriik ida nee mak hatudu postura polisia nia, tanba nee enkoraja feto atu konkore, husu ba ita boot sira fo hatene feto foinsae sira bolu mai para konkore,” katak nia.
Ministru nee dehan, iha PNTL regra mak sei komanda, no displina mak sei komanda, halao servisu ho displina no servisu profisional no halao servisu ho diak hodi tau matan ba estadu no rai nee ba oin.
“Kouta nee ami diskute ona komando dehan ba hau, maibe ami diskute mak sei haree, tanba iha polisia iha area balu ke presiza mane barak oituan para halao servisu, ezemplu hanesan area intervensoens, fronteira neebe dook ida nee ita presiza mane neebe barak, kerdizer ita la diskrimina feto, feto mos bele ba maibe tenke kria kondisoens neebe diak mak feto ba, maibe kondisoens seidauk diak mak feto ita husu nafatin lai iha fatin seluk, kuandu prepara ona fatin mak ba, se lae ba iha neeba inan feton sira hakilar beibeik haruka feto ba maibe la kria kondisaun, neebe konfia hela fiar no husu imi nia ajuda para hatoo ba publiku hotu kona-ba rekrutamentu nee,” katak nia.
Iha fatin hanesan, Komandante Sentru Formasaun Polisia, Superintendente Xefe Polisia, Arquimino Ramos hatutan, agora daudaun iha kriteria neebe Komando PNTL aprezenta ona ba Ministru, nunee bele hasai diploma kona-ba kriteria rekrutamentu.
“Ita hamenus kriteria balu tanba saida mak ita analiza iha kursu sira, liu ba nee maioria feto barak lakon iha ezame fizika tanba nee mak ita redus,” katak nia.
Nia hatete, uluk nee fo 15% ba feto maibe ida neebe liu nee 12% deit balu la too tan, agora daudaun proposta nee ba 20%, maibe sei redus kriteria balu nunee bele hasae numeru feto.
Nia hatutan, proposta ba rekrutamentu membru PNTL tinan-tinan sempre hatoo no tinan ida nee sei rekruta 500, no tinan oin numeru nee sei iha nafatin neebe kolokasaun ba orsamentu annual PNTL nia tinan-tinan aloka ba rekrutamentu sempre iha maibe desizaun iha Governu.
Nunee mos Prezidente Republika, Jose Ramos Horta dehan, Igualdade Jeneru nee difisil maibe ho esforsu tenke aumenta.
“Mais realidade mak nee, ita labele obriga sosiedade Timor mak nee feto sei hakarak natural bele hetan namoradu ida la kleur isin rua nee mos natural, depois signifika fulan hira kedas iha uma depois oan mai labele soe iha uma mai entrega ba ama sira nee mak difikuldade natural ida atu rekruta feto,” hatete PR, Horta.
(eme)
