DILI, STLTIMORLESTE.com – Ministru Interior (MI), Francisco da Costa Guterres husu ba inan-aman sira hotu atu kontinua kontrola no monitoriza aktividades oan sira, para la bele involve iha problema sira neebe bele estraga sira nia aan no mos estraga ema seluk.
Ministru Francisco da Costa Guterres hato’o mensajen nee liu husi Portavoz Seguransa Ministeriu Interior, Superintendente Polisia, Joao Belo dos Reis iha konferensia imprensa neebe realiza iha Edifisiu Ministeriu Interior, Kaikoli, Dili, Kinta (14/8/2025).
Ministru Francisco dehan, seguransa nasional nee responsabilidade kolektivu, seguransa laos deit tarefa Polisia ka Forcas de Seguransa, maibe presiza mos partisipasaun aktivu husi komunidade no sosiedade sivil sira.
Tanba nee, Ministru Francisco apela ba sidadaun hotu-hotu atu respeita lei no regulamentu sira neebe iha, partilha informasaun relevante ba autoridade kompetente, koopera ho PNTL no autoridade seguransa seluk iha ezekusa misaun sira.
“Ministeriu Interior liuhosi PNTL sei kontinua servisu ho transparensia, integridade no kompromisu ba defesa lei no seguransa nasional,” dehan Ministru Francisco.
PNTL Rejista kazu krime 65
Iha konferensia imprensa nee, Portavoz Joao Belo relata kazu krime, asidente tranzitu no infrasaun ba kodigu estrada neebe akontese iha semana ida nia laran.
Nia dehan, Polisia Nasional Timor Leste (PNTL) iha semana ida nia laran rejista kazu krime hamutuk 65 no husi total nee, kazu lima (5) neebe konsidera aas liu hanesan, kazu violasaun domestika (23), kazu asaltu (22), kazu asaltu seksual (9), kazu ameasa (3) no kazu burla (2).
Tuir Portavoz Joao Belo, husi kazu krime 65 nee, Kapital Dili produs kazu aas liu ho total 37 neebe produs husi Eskuadra Dom Aleixo, Nain Feto, Cristo Rei no Vera Cruz no tipu krime Violasaun Domestika sai nafatin krime neebe okupa kazu aas liu iha Timor Leste husi loron ba loron.
Alein de nee, PNTL mos rejista kazu asidente tranzitu no infrasaun ba kodigu estrada durante semana ida nia laran hamutuk 35 no husi total kazu nee rezulta vitima hamutuk 53 kompostu husi kanek kman 47, kanek todan 5 no mate nain ida.
Nia dehan fatores principal neebe kontribui ba asidente sira akontese tanba kondutor la iha esperiensia kondus transporte, transporte kondisaun la diak mais obriga nafatin, velosidade la kontrola no konsumu alkohol wainhira kondus transporte.
Portavoz Joao Belo mos hatete katak kazu infrasaun ba kodigu estrada, Polisia Tranzitu rejista kazu infrasaun hamutuk 382 kompostu husi transporte Governu 4, transporte privadu 330 no transporte publiku 19.
Nia informa katak tipu infrasaun neebe komete husi kondutores ka motorista sira mak kontra ordem autoridade ka karta kondusaun la iha, la uza kapasete, la lori dokumentu, kontra sinais sira no la monta asesores.
Portavoz Joao Belo mos relata kona ba movimentu sidadaun estranjeiru tama no sai durante semana ida nia laran hamutuk ema nain 15.891 kompostu husi mane 9.586 no feto 6.205.
Ministeriu Interior liuhosi Portavoz Joao Belo dos Reis apela ba ema estranjeiru sira neebe halao negosiu iha Timor Leste, la bele fa’an sasan ka leba sasan lao ba mai, tanba lei Migrasaun Timor Leste nian bandu ema estrajeiru leba sasan lao ain ka ho motor tama no sai bairo sira.
(mik)
