DILI, STLTIMORLESTE.com – Governu Timor Leste liu husi Ministru Interior (MI), Francisco da Costa Guterres husu publiku atu selebra ho maneira responsavel, seguru no hakmatek, evita violensia, asidente no abuzu alkohol hodi garante alegria hamutuk ho seguransa.
Ministru Interior Francisco da Costa Guterres hato’o mensajen Natal no Tinan Foun nee liuhosi Portavoz Seguransa Ministerio Interior nian, Superintendente Polisia, Joao Belo dos Reis iha konferensia imprensa neebe halao iha Sala Multimedia, Ministeriu Interior, Vila Verde, Dili, Kinta (18/12/2025).
Portavos Joao Belo dos Reis neebe akompanhia husi Xefe Gabinete Diresaun Servisu Migrasaun, Miguel Gomes informa katak seguransa nee responsabilidade ema hotu nian nunee Ministeriu Interior apelu ba sidadaun hotu-hotu atu partisipaativamente, respeita lei, no kolabora ho autoridade sira hodi prevene krime no hametin dame iha ema hotu nia leet.
Portavos João Belo mos dehan katak Ministeriu hatoo agradesementu laran tomak ba forsa seguransa, autoridade lokal, media no komunidade sira neebe kontinu fo kontribuisaun ba manutensaun seguransa no ordem publika.
Nia dehan, Governu sei kontinua servisu ho profesionaliszmu hodi proteje povu no hadia seguransa iha rai laran tomak.
Iha konferensia imprensa nee, Portavos Joao Belo mos relata kazu neebe rejista no atende husi Polisia Nasional Timor Leste (PNTL) teritoriu Timor Leste laran tomak husi loron 8 to’o 14 dezembru 2025 hamutuk 58 no husi total kazu refere kazu lima neebe ass liu presiza atensaun publiku mak hanesan ofensas integridade fisiku simples 16, maus tratas ba konjuje 15, kontra bandu 3, danu simples 2 no amiasas 2.
Husi total kazu krime nee, katak Portavos Joao Belo, kapital Dili rejista kazu aas liu ho total 45 no tipu krime violasaun domestika sai nafatin krime neebe okupa kazu aas liu iha Timor Leste husi loron ba loron.
Aleinde nee, Portavoz João Belo mos relata konaba asidente Rodoviaria neebe rejista iha Incident Management System (IMS) ka Sistema Jestaun Insidente PNTL nian, durante periodu semana ida nian hamutuk 47 asidente neebe akontese iha munisipiu no kapital Dili.
Nia dehan husi total asidente 47 nee rezulta ema nian 53 kanek kmaan, 10 kanek grave ka todan no mate ida. Husi dadus nee kapital Dili nafatin produs asidente barak liu 13 tuir kedas Munisipiu Baukau 6 no Munisipiu Likisa 5.
Jornalista: Mikael Mali Mau
Editor: Mikael Mali Mau
