DILI, STLTIMORLESTE.com – Ministru Interior (MI) Francisco da Costa Guterre husu ba publiku depozita konfiansa tomak ba komisaun rekrutamentu membru Polisia Nasional Timor Leste (PNTL) foun.
Nia dehan, tempu ona tau konfiansa tomak ba Timoroan neebe mak hola parte iha komisaun rekrutamentu membru PNTL foun, tanba sira iha kapasidade atu halo servisu hodi halo selesaun ba membru polísia foun sira.
“Hau fiar polísia sira nee lalika kestiona sira nia kapasidade, hau fiar sira, ita tenke fiar sira, agora ita ba fiar fali malae sira, ita mos iha matenek barak, ita tenke fiar ba ita nia maluk Timoroan sira,” hatete Ministru Interior (MI) Francisco da Costa Guterres ba jornalista sira iha edifisiu MI Vila Verde, Sesta (15/08/2025).
Nia tenik, ema balun kestiona mekanizmu rekrutamentu hodi hateten, tanba sa mak rekrutamentu nee labele halo liu husi via online para evita ema labele forma naruk, tanba sa mak rekrutamentu uza tali no regua sukat kandidatu sira. Nee normal no laiha problema tanba Komisaun rekrutamentu nee Timoroan no sira hatene saida mak sira halo.
Nia esplika, labele ba rona fali prespetiva malae sira katak, kriteriu sukat ema ho metru nee la diak.
“Ita tenke fiar ita nia maluk Timor, imi hotu hakarak ita tenke lori malae mai sukat ka, malae mos mai fiar sukat deit ita fiar deit ka, ita tenke fiar malu, neebe Timoroan hau fiar sira, sira sukat los no sira haree los hau fiar katak laiha,” nia informa.
Nia husu jornalista sira tenke buka promove Timor oan sira, labele jornalista mak ba buka soke uluk uluk Timoroan, labele buka malae deit.
Nia hatutan, sasan sira neebe mak uza hodi sukat kandidatu sira nee komisaun valida hotu-hotu mak uza hodi sukat, maske sasan sira manual.
“Neebe laiha problema ida, tanba nee hau fo hanoin ba imi hotu katak ita fiar ba sira, ita fiar katak sei halo buat ruma ho diak. Se seguransa ita fiar sira, entaun buat sira hanesan nee tau fiar ba sira ba sira sei halo buat ruma neebe diak ba ida nee,” nia konklui.
(jen)
