DILI, STLTIMORLESTE.com – Governu liu husi Ministeriu Interior (MI) orienta ona Komando Polisia Nasonal Timor Leste (PNTL) atu promove dialogu ho Autoridade Indonezia, hodi buka solusaun ba problema kazu iha Fronteira Oekusi no Indonezia, inklui sidadaun Indonezia neebe mate iha area fronteira Fatumea Munisípiu Kovalima foin lais nee.
Ministru Interior (MI), Francisco da Costa Guterres dehan, agora ekipa PNTL neebe iha Oekusi no Kovalima, liu-liu iha fatin akontesimentu, halao dialogu hodi buka solusaun ba problema nee.
“Ami kontinua tama ho dialogu, ita kontinua halo dialogu, oinsá ita buka mos ho komunidade. Ita mobiliza komunidade, komunika ho autoridade lokál para depois ita kontinua tenta, kontinua halo nafatin dialogu, tanba meus de dialogu nee mak ajuda atu rezolve problema. Neebe ita aproveita dialogu nee mak ita foin hatene problema nia hun mak ida neebe depois mak ita buka solusaun hodi rezolve tiha problema nee,” hatete nia ba jornalista sira iha nia knar fatin Vila Verde, Kinta (04/09/2025).
Governante nee informa, agora daudaun dialogu lao ona, foin daudaun ba kazu Oekusi Komando desloka ekipa ba kedan fatin akontesimentu nomos hahu prosesu dialogu iha Suai, sira komesa tenta mobiliza polísia komunitaria hodi halo dialogu ho komunidade sira para buka solusaun ba problema nee.
Iha fatin hanesan, Portavoz Komando Jeral PNTL, Superintendente Polísia João Belo dos Reis informa, situasaun iha fatin akontesimentu RAEOA no Suai nee kontroladu.
“Ami halo kordenasaun ho autoridade Indonazia lao diak teb-tebes i depois ba kazu Oecusse husi investigsaun kriminal aprezenta autus ona ba Ministeriu Publiku, hodi kontinua prosesu ba investigasaun kriminal nian,” nia deklara.
Nia esplika, ba kazu neebe akontese iha Oekusi iha duni indisiu katak iha sidadaun neebe hela besik fronteira Oekusi mak muda tiha destaka, tanba nee mak mosu komunidade Oecusse too problema mosu. Maibe ba prosesu nee investigasaun lao hela i negosiasaun parte Indonézia kontinua lao, tanba iha indikasaun tanba fronteira neebe iha nee maluk sira halo mudansa, maibe parte instituisaun ekipa husi nasaun rua halo servisu tuir akordu neebe mak iha kontinua hamutuk hodi halo investigasaun, nunee fo solusaun ba problema nee.
Belo hateten, situasaun iha fatin akontesimentu kontroladu, tanba autoridade Indonézia mos aviza ka apelu ba nia sidadaun sira atu labele tama area neebe mak la pertense ona ba sira.
Nia afirma, agora daudaun fatin akontesimentu kontroladu tanba husi UPF halo kordenasaun ho TNI diak teb-tebes, no parte rua kompromete katak garante seguransa iha liña fronteira ho diak.
Jornalista: Jeniche da Costa
Editora: Domingas Gomes
