DILI, STLTIMORLESTE.com – Ministru Interiór (MI), Francisco da Costa Guterres orienta ona Komandante Jerál no Segundu Komandante Jeral rezolve Superintendente Polísia Julia Gama nia problema.
“Hau husu ona ba komandante jerál atu kria komunikasaun ida diak entre sira. Entre sira mos presiza iha komunikasaun, presiza mos reuniaun beibeik, presiza mos koalia ba malu beibeik para dehan katak lae ofisiál Superior ita mak tenke asegura instituisaun ida nee, institusaun ida nee ninian lalaok diak, ninian profisionalizmu nee asegura husi ofisiál superiór sira nee mak importante,” hatete Ministru Interiór (MI) Francisco da Costa Guterres ba jornalista sira hafoin serimónia aniversariu ezisténsia PNTL ba dala-26 neebe halao iha Palásiu Governu, Sesta (27/03/2026).
Nia dehan, tama ona polísia hakarak ka lakohi obedese ba regra neebe mak regulariza ona polísia.
“Ami mos haree hela halo diskusaun ba nia (Julia Gama) hotu para depois foti desizaun sira neebe diak no prontu kestaun sira nee, hanesan nee dala barak seidauk iha komunikasaun diak”, nia esplika.
Tanba nee nuudar Ministru Interiór husu ona ba Komandante Jerál atu kria komunikasaun ida diak entre sira.
“Entre sira mos presiza iha komunikasaun, presiza mos reuniaun beibeik, presiza mos koalia ba malu beibeik para dehan katak lae ofisial Superiór ita mak tenke asegura instituisaun ida nee, institusaun ida nee ninian lalaok diak, ninian profisionalizmu nee asegura husi ofisiál superiór sira nee mak importante,” nia deklara.
Governante nee bolu ona Komisáriu Afonso dos Santos no mos Segundu Komandante Jeral Komandante Natercia husu ona ba sira nain rua katak komunika, kria komunikasaun para depois ita haree oinsa rezolve tiha ninian problema nee.
“Depois ita buka para ajuda nia atu tama fila fali, hodi haree fila fali nia hanesan ofisiál Superiór ida”, nia informa.
Nia hatutan, Superintendente Julia da Gama lakon direitu ba promosaun nia sei hetan promosaun hafoin Komandante Jerál PNTL Komisáriu Asisténte Polísia Afonso dos Santos no Segundu Komandante Jerál Komisária Asisténte Natercia Eufrasia Soares Martins rezolve tiha nia problema.
“Nia problema saida, hau bele hanoin nia lakon ninian direitu, nia sei iha deit demora tanba iha deit kestaun balun mas ida nee ami agora daudaun haree hela, review fali nia kazu ami halo revizaun hela”, nia koalia.
Tanba nee agora daudaun Komisáriu Asisténte Polísia Afonso dos Santos no Segundu Komandante Jerál halo hela revizaun ba Superintendente Polísia Julia Gama.
“Ita asegura nia para nia labele lakon nian direitu maibe tenke tuir regras neebe mak iha. Nia sei lakon nia direitu maibe agora ami haree hela halo hela review ba lei sira nee, kuandu lei sira nee ita halo hotu ona revizaun mak ita haree buat sira” nia haktuir.
Nia koalia, Julia Gama sei promovidu maibe sei haree didiak nia regra sira nee, nunee ba oin membru polísia bele tuir, lao tuir para instituisaun PNTL nee moris iha regras nia okos.
“Sira hotu hotu hakarak tama polísia nia tenke obedese regras neebe mak iha neeba para regulariza nia, se nia haksoit sai husi regra nee automátikamente ita tenke aplika sansaun disipliñar ba nia, tanba ita nia instituisaun nee ita hakarak sira tenke profisional, tenke disipliña para tenke halao servisu nee didiak”, nia hatutan.
Kona-ba Julia Gama lekar segredu, intervensaun Governante nee dehan nia koalia ona ho Komandante Jerál komunika ho Julia Gama para depois sei haree.
“Hau fiar katak sira nain rua nee idak- idak iha nia kapasidade, tanba nee mak hau fiar katak sira sei jere nee ho didiak no komunikasaun entre sira nee sira sei loke reuniaun regular para depois koalia ba malu hodi dudu Ofisiál Superiór nee para sente katak polísia nee sira nia, polísia nee laos ema ida nian, tanba nee mak sira neebe iha instituisaun nee sai forti sai forsa para bele kontribui ba iha pas no kontribui ba dezenvolvimentu rai ida nee ninian, ida nee mak importante”, nia tenik.
Nia dehan, polísia sira presiza promove dialogu para aban bain rua lideransa PNTL mandatu hotu sira husik hela buat di’ak ba jerasaun foun sira, ida nee mak importante.
“Hau hanoin sira sei review hela nia kazu depois ita haree, neebe hau entrega ona ba komandante jerál no segundu komandante jerál sira sei loke dialogu ida oinsá atu rezolve tiha problema nee,” nia afirma.
(jen)
