DILI, STLTIMORLESTE.com – Prezidente Republika (PR), Jose Ramos Horta hatete, Ministeriu Interior (MI) presiza rona mos hanoin husi Komando Polisia Nasional Timor Leste (PNTL) nomos komandante seluk, liga ho desizaun atu anula rekrutamentu ba membru PNTL.
Prezidente Republika Jose Ramos Horta hatoo kestaun nee ba jornalista sira, bainhira remata vizita ba Jakarta no fila hikas mai Timor Leste iha Aeroportu Internasional Nicolau Lobato, Komoro Tersa (24/03/2026).
“Hau rona deit, akompanha deit Governu nia esforsu atu hadia tiha prosesu nee, lo-loos tenke ministeriu tenke rona komandante sira labele desizaun ruma halo deit iha Ministeriu Interior nia laran, tenke rona ba komandante sira, komandante sira nee servisu diak, komandante PNTL tinan sira nee nia laran hau haree ema neebe diak iha esperiensia profisionalizmu,” dehan Prezidente Republika.
Prezidente Republika hatete, atu evita halo sala diak liu halo tuir prosesu neebe uluk nia no Ministeriu Interior mos presiza rona Komando PNTL sira, tanba sira mak konhese ema, labele desizaun husi Ministeriu Interior deit.
“Nee duni evita halo sala, diak liu halo tuir prosesu neebe uluk halo tiha ona desizaun laos deit iha Ministeriu Interior mak mak halo, maibe tenke rona komando sira sira mak koinese ema sira, mais halo dadaun prosesu foun hau apoiu,” dehan PR Horta.
Foin lalais Primeiru Ministru Kay Rala Xanana Gusmao hatete, konaba rekrutamentu ba kadetes foun PNTL tinan 2025 arkiva tanba mosu kontestasaun barak, tanba nee planu sei loke foun fali.
“Iha manifestasaun fali ona, konaba prosesu rekrutamentu neebe ami hodiseik, ami imforma ona ba ita boot sira katak ami bolu husi Australia, husi Portugal, ho mos partisipasaun sosiedade sivil nia ami ba haree didiak fali prosesu tomak rekrutamentu neebe provoka kontestasaun barak, mak ami haree didiak husi rekomendasaun husi senhor sira polisia mai husi Australia, Portugal sira dehan katak diak liu loke fila fali buat ida uluk nee ita arkiva tiha loke fila fali,” dehan Primeiru Ministru Kay Rala Xanana Gusmao.
Primeiru Ministru hatete, ekipa polisia husi Australia no Portugal rekomenda katak diak liu arkiva tiha rekrutamentu antes nee no loke foun fali, neebe loke fila fali mak Ministru Interior sei esklarese didiak ba publiku.
“Neebe loke fila fali mak sei iha Ministru sei esklarese didiak ba imi sei iha faze tolu, premeiru hotu hotu tuir faze ida se mak lakon iha faze premeira nee ba ona, lahanesan ida ba ida nee no ida ba ida nee, Segunda faze kala numeru menus ona Semak lakon sai ona, depois ba faze terseiru Semak lakon mos sai nunee buat hotu transparante no justu,” dehan PM Xanana.
Primeiru Ministru hatete, Governu hamutuk ho ekipa Polisia husi Australia no Portugal deside ona, tanba nee ohin mai informa ba Prezidente Republika Jose Ramos Horta.
(eme)
