DILI, STLTIMORLESTE.com – Relatoriu enkontru Prezidente Republika Timor Leste, Jose Ramos Horta ho grupu opozisaun Mianmar nian hamosu reasaun makaas husi Governu Mianmar hodi husu ba Enkarregadu (Charge d’Affaires) Timor Leste nian iha Yangon atu sai husi sira nia nasaun.
Razaun Governu Mianmar nian husu ba Enkarregadu Timor Leste nian iha Yangon atu sai husi sira nia nasaun nee, tanba autoridade Mianmar deskonfia Enkarregadu Timor Leste nian iha Yangon halo kontaktu ho grupu neebe sira konsidera ilegal.
Tuir deklarasaun ofisial husi Ministeriu Negosiu Estranjeiru Mianmar, diplomata Timor Leste nian nee alegadamente halo interasaun ho Governu Unidade Nasional (NUG) no Organizasaun Direitu Umanu Chin (CHRO), neebe dezignadu hanesan organizasaun terorista sira tuir lei Myanmar nian. Ministeriu Negosiu Estranjeiru Mianmar konsidera katak asaun sira nee hanesan violasaun ida ba soberania no integridade Mianmar nian no kontrariu ho prinsipiu la interferensia iha relasaun diplomatiku sira.
Relatoriu nee mos haktuir katak Prezidente Timor Leste, José Ramos Horta, hasoru malu ona ho delegasaun sira husi grupu opozisaun hirak nee iha liur Mianmar. Maski enkontru Prezidente Horta ho grupu opozisaun nee halao iha estranjeiru, Mianmar sublinha katak kualker envolvimentu husi ofisial estranjeiru sira ho organizasaun sira neebe dezignadu hanesan terorista sira la aseitavel.
Too notisia nee publika iha media nee, Governu Timor Leste seidauk hatan ofisialmente ba pedidu atu sira nia Enkarregadu sai husi Mianmar, no seidauk klaru se diplomata nee kumpri ona ka lae.
Kazu nee bolu atensaun ba aumentu tensaun diplomatika sira entre nasaun rua nee no destaka sensibilidade husi envolvimentu estranjeiru iha polítika interna Mianmar nian.
(mik)
