DILI, STLTIMORLESTE.com – Mianmar ofisialmente informa ba Malazia la suporta adezaun Timor Leste (TL) nia iha fulan Outubru, ho karta nee Primeiru Ministru Kay Rala Xanana Gusmão hatete, nee laos problema.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (08/07/2025).
Primeiru Ministru dehan, relasiona ho deklarasaun husi Mianmar nia oras nee daudaun Ministru Negosiu Estranjeiru Bendito Freitas ho Visi Ministra ASEAN, agora daudaun halo enkontru hela iha Malazia, neebe sira bele esklarese klaru iha neeba.
“Nee laos problema, hau la hatene tanba sa, tanba iha reuniaun Malazia sira mos apoia, hau sente katak tanba ema Mianmar ida mai iha nee koalia, mai husi luzu nuudar luzu Asiatiku nia temi ami book aan la diak, tanba ida nee no ida neeba, tanba nee mak hau mai buat sira nee hotu mais ami koalia ba malu dehan iha nee la koalia politika, nee duni ema ida la halo komentariu, sira kala rona, ema ida la halo komentariu buat ida neebe ita lalika preokupa ba ida nee, agora nee Ministru MNEK Bendito ho Visi Ministra ASEAN sira agora tuir hela reuniuan iha Malazia, neebe hanoin sira esklarese malu neebe ita lalika hanoin barak kona-ba ida nee,” dehan PM Xanana.
Primeiru Ministru dehan, kona-ba Mianmar nia agora daudaun Ministru Negosiu Estranjeiru no Kooperasaun, Bendito Freitas ho Visi Ministra ASEAN tuir hela reuniaun iha Malazia bele esklarese, tanba nee husu lalika hanoin barak kona-ba deklarasaun nee.
Primeiru Ministru hatete nia labele resposta barak tanba oras nee daudaun Ministru no Visi Ministra ASEAN iha Malazia, husik buat nee lao, tauk problema halo saida.
“Problema boot hau mak kria duni, hau iha nee duni, antes de ba reuniaun iha Setembru 2024 iha Jakarta imi buat ida kiik ita husu ba malu dehan katak husik ba sira mak bele rezolve,” katak PM.
Relasiona ho deklarasaun nee Prezidente Republika Jose Ramos Horta hatete, komunikadu husi Mianmar la konkorda Timor Leste adere ba ASEAN iha fulan Outubru, ida nee labele espekula barak tanba desizaun Timor Leste tama formalmente tama ASEAN halo tiha ona, Nivel Xefe Estadu, iha Kuala Lumpur Malazia, desizaun halo ona no sai ona komunikadu final marka iha fulan Outubru.
Prezidente Republika hatete, agora daudaun Timor leste halo hela preparasaun ba serimonia Timor Leste adere ba ASEAN iha fulan Outubru se rai ruma la partisipa iha Simeira iha Kuala Lumpur nee sira nia problema, no Mianmar mos la partisipa tinan 3 ona tanba golpe iha loron 1 Fevereiru 2021, simeira ASEAN la konvida sira partisipa iha simeira, bele partisipa deit hanesan nivel tekniku senior MNEK nia.
Aleinde nee Mianmar mos ofisialmente informa ba Malazia atual Prezidente ASEAN katak sei la suporta adezaun Timor Leste nia iha fulan Outbubru, tuir fonte sira neebe konfirmadu.
Pozisaun Ofisial Naypyidaw nia foin daudaun hatete ba Malazia katak Timor Leste la konsege adere ba prinsipiu non interferensia iha asuntu internu sira hanesan konsagradu iha karta ASEAN nia.
(eme)
