DILI, STLTIMORLESTE.com – Ministru Defeza, Donaciano da Costa Gomes ‘Pedro Klamar Fuik’ husu ba Membru FALINTIL – Forsa Defeza TImor Leste (F-FDTL) labele uza viatura Tatika hodi tula fali familia no sivil, tanba nee tenke implementa normas, regaras, lei no regulamentu, atu bele kumpri kualker misaun.
Nia dehan, gosta profisaun, maibe tenke konhese prosedimentu hotu-hotu neebe mak eziste, atu bele utiliza teknolojia neebe mak simu ona, teknolojia neebe mak atribui ona ba militar nee halao misaun iha Instutisaun F-FDTL.
Ministeriu Defeza nee husu ba Komando Forsa Armadas liu-liu ba Xefe Estadu Maior F-FDTL, Tanente Jeneral Domingos Raul’ Falur Rate Laek’ atu bele dezempenha funsaun no implementa objetivu neebe mak diak tuir saida mak povu no nasaun hakarak nee, kontribuisan empenhnamentu husi militar nian ba fundamental.
“Publiku lakohi haree ita lori Karreta Tátika nee ba tula familia, atu ba tula ita sivil sira, hau rejeita situasaun rua, ida tanba akontesimentu iha Oekusi, ita nia viatura Tátika foin hola, tanba Militar sira la kumpri objetivu neebe mak defini iha hirarkia Komando F-FDTL, sira inisiativa tula ema sivil iha viatura Tátika Militar, depois ida tan akontese iha Likisa mos,” dehan Ministru Defeza, Donaciano da Costa Gomes ‘Pedro Klamar Fuik’, ba jornalista sira iha resintu Kuartel Jeral F-FDTL, Fatuhada, Dili, Kinta (09/1/2025).
Maibe nia dehan, politika sira atu atribui meus sira nee ba iha militar sira laos fasil, tanba nee tenke relata situasan neebe mak real. Buat hirak nee hotu povu nian, mai husi povu ba povu, utiliza halo didiak, atu defende povu nia interse.
Iha fatin hanesan, Xefe Estadu Maior F-FDTL, Tanente Jeneral Domingos Raul’ Falur Rate Laek’ agradese tebes ba Ministeriu Defeza neebe apoiu tan viatura Tátika 10 ba Komando F-FDTL atu uza hodi halao servisu.
“Ita agradese tan ba Ministru Defeza apoiu tan viatura Tátika 10 ba Komando F-FDTL,” dehan nia.
Entretantu Governu liu husi Ministeriu Defeza entrega tan karreta Tátika 10 ho Marka BAIC ba Komando FALINTIL Forsa Defeza TImor Leste ( F-FDTL) atu uza hodi halao misaun ho didiak, depois karreta hirak nee sosa uza OJE tinan 2024 ba komandantes kompanhia no komandante pelutaun sira FALINTIL-Forsa Defeza Timor Leste (F-FDTL), atu uza hodi haree forsa sira nia progresaun iha terrenu.
(jen)
