DILI, STLTIMORLESTE.com – Deskonfia militar nain ida abandona nia feen ho oan iha uma 200 Baucau.
Tuir Portavos Komando F-FDTL, Kapitaun Mar e Guerra, João Silva rekonhese kazu militar mane abandona feen ho oan, problema nee akontese dala barak ona, Kazu espesífiku ba feen laen la sita iha Regulamentu Dixiplina Militar.
“Maibe Xefe Estadu Maior Jeneral, nia foti ona desizaun rigorozu relasiona militar abandona feen ho oan, jeneral hasai militár lubuk ida ona husi forsa armada, liu husi justifikasaun katak nia komete kazu no kazu nee akontese duni,” dehan Kapitaun Mar e Guerra, João Silva ba jornalista sira iha Quartel General Fatuhada, Dili, Segunda (14/10/2024).
Nia dehan, kuandu kazu hanesan akontese tan, liu husi prosesu investigasaun justifika, komando sei hasai soldadu, sarjentu ka ofisiais.
“Kazu abandona feen oan iha uma 200, liu ona tinan ida, nee demaziadu, normalmente fulan ida rua sei konsidera, mas tinan ba rua, nee nia militar ultrapasa ona,” katak nia.
Nia akresenta, nia la ba uma 200 iha Baukau, neebe nia ba hela fila fali iha fatin seluk, entaun atu foti desizaun hasai feen ho oan husi uma 200, tenke liu husi prosesu ida, laos abandona, komando ba hasai obrigatóriu nee lae.
“Prosesu dixiplinar nia liga ho tomada desizaun militar, atu foti desizaun ida nee tenke bazeia ba dokumentu evidensia sira justisa nian foin bele hasai militár sira nee, kuandu justifika katak nia abandona duni too tinan ida nia bele hasai husi forsa armada,” katak nia.
Nia akresenta, kazu hanesan nee komando foti desizaun dala barak ona, tanba nee ba militar soldadu, sarjentu too ofisiais neebe halao knaar iha fatin neebe deit, kontinua kria ambiente relasaun ida neebe mak diak ho família.
“Ita boot sira ba halo misaun iha postu sira, nee misaun nasaun no misaun povu nian, labele ba utiliza fila fali ba halo misaun hodi abandona fila fali ita boot sira ninia feen oan iha fatin ida, komando ninia apelu kontinua dixiplina no kontinua haburas ita boot sira ninia amizade ba família, nunee bele servisu ba nasaun estadu ida nee ho diak,” nia hakotu.
(mar)
