DILI, STLTIMORLESTE.com – Ministeriu Defeza entrega armamentu militar ba Komando FALINTIL-Forsa Defeza Timor Leste (F-FDTL) atu uza ba nesesidade institusional.
Ministru Defeza Kontra Almirante Donaciano Costa Gomes “Pedro Klamar Fuik” dehan, tipu armamentu militar neebe Ministeriu Defeza entrega mak metralhadora M249, metralhadora M60E6, no munisoes ho tipu bala real M4, bala real ho pita, bala real 7.62 x 51 MM, bala real ho pita 7.62xMM, bala pistola real glock 45, bala pistola real glock 23, bal simulada 5.56×45 no bala simulada ho pita 5.56×45 MM.
Nia esplika, ohin asiste serimonia entrega de armas, no armamentu militar nee Governu halo akizisaun uza orsamentu 2023 neebe preve ona iha lei programasaun militar.
“Ohin ita entrega arma tipu tolu, mini ou M249, metralhadora lijeira atu kompleta organika iha estrutura kombate nian. Ita mos entrega M60 matralador material semi- pezadu. M60 nee nia funsaun atu destroi inimigu nian pozisaun kuandu sira iha defensiva ruma kuandu sira tama ita nia rain, ita haruka ita nian ekipa para sobu. Depois ita mos entrega pistola glock ualu no munisoes,” hateten Ministru Defeza Kontra Almirante Donaciano Costa Gomes “Pedro Klamar Fuik” ba jornalista sira iha nia intervensaun iha ambitu serimonia entrega ekipamentu ba Komando F-FDTL iha Kuatel Jeneral F-FDTL Fatuhada, Sesta (24/1/2025).
Nia esplika, armamentu militar nee governu halo akizasaun uza Orsamentu Jeral Estadu neebe preve ona iha lei programasaun militar.
Nia informa, Governu iha obrigasaun atu halo invetimentu ba militar oinsa atu modernuza nunee Instituisaun F-FDTL bele dezenvolve Aan diak Liu Tan sai Instituisaun militar neebe servi estadu povu ho profisional.
Ministru Defeza, Pedro Klamar husu ba Komando F-FDTL, liu-liu militar sira atu kuidadu sasan sira neebe mak Governu entrega ona hodi uza ba nesesidade instituisaun ho responsabilidade.
Iha fatin hanesan, Xefe Estadu Maior Jeneral F-FDTL, Domingos “Raul Falur Rate Laek” agradese ba esforsu Governu neebe sempre tau matan ba instituisaun F-FDTL, hodi dezenvolve aan sai forsa neebe modernu.
“Hau agradese ba esforsu senhor Ministru nian neebe ho esforsu oin-oin atu apoia instituisaun F-FDTL enternus rekursu umanu no material. Ida nee duni mak ita boot nia palavra de ondra,” nia deklara.
Nia koalia, Governu hahu tau matan ba F-FDTL, tanba hanesan Xefe Estadu Maior Jenderal F-FDTL husu ba militar sira hatudu komportamentu neebe diak, tau iha pratika hodi kuidadu material militar neebe Governu fo ba F-FDTL.
(jen)
