DILI, STLTIMORLESTE.com – Governu liu husi Ministeriu Defeza hamutuk ho Institutu Defeza Nasional (IDN) hetan vizita husi Xefe Gabinete Guarda Nasionál, Ministeriu Defeza Estadus Unidus Amérika (EUA), Jenerál Steven S. Nordhaus hodi hametin kooperasaun diak liu tan ba futuru.
Ministru Defeza Kontra Almirante Donanciano Rosario da Costa Gomes “Pedro Klamar Fuik” hatete, Ministeriu Defeza hamutuk ho IDN hetan vizita husi Xefe Gabinete Guarda Nasionál, Miniastériu Defeza EUA, Jenerál Steven S. Nordhaus neebe mai hodi hametin relasaun amizade no kuadru kooperasaun entre Timor Leste (TL) ho EUA.
Nia tenik, relasaun ida neebe hahu kedas iha tinan 2002 iha restorasaun independénsia, no relasaun ida nee mai halo hamutuk iha kooperasaun bilateral no kooperasaun programa neebe halo dezde prinsipiu too agora.
“Depois tempu balun kuandu iha diskusaun ba iha kuadru bilateral la halo, maibe ho vizita Jenerál Steven S. Nordhaus, ami hanoin katak depois ita prepera tiha ita nia referensia kooperasaun internasional dominiu defeza ita sei hahu, bele hahu fila fali servisu hamutuk ho EUA,” hatete Ministru Defeza, Kontra Almirante Donaciano Rosario da Costa Gomes “Pedro Klamar Fuik” ba jornalista sira iha Salaun IDN, Palasiu Governu, Kinta (03/04/2025).
Nia esplika, iha kooperasaun EUA entre TL nee iha kooperasaun neebe estabelese ona, sira iha orsamentu ida propriu para apoiu Governu TL.
“Sira iha orsamentu ida propriadu para apoiu ba ita, liu-liu iha manutesaun ba iha area portu Baukau, partisipa iha atividade ezersisiu harii hamutuk konstrui kazerna balun ba iha ita nia militar sira, no iha atividade balun neebe apoiu ita nia komunidade sira,” nia deklara.
Iha fatin hanesan, Xefe Gabinete Guarda Nasionál, Ministeriu Defeza EUA, Jenerál Steven S. Nordhaus hatete, importansia husi kolaborasaun kontinua entre EUA no TL iha setor defeza no vizaun hamutuk ba futuru ida neebe seguru no prosperu.
Durante ninia vizita, Jenerál Nordhaus halo ona diskusaun altu nível hirak ho Ministru Defeza, Donaciano do Rosário Gomes “Pedro KlamarFuik” atu halo kooperasaun diak liu tan, liu-liu haree liu ba programa parseria Estadu nian.
Nia deklara, kooperasaun militar bilaterál hasae kapasidade defeza nian no fasilita interkambiu perísia estratejiku sira hodi apoia estabilidade no seguransa rejionál iha Indo-Pasífiku.
“Ita hakarak parseria neebe forte no buras entre EUA no TL, nunee reflete kompromisu hamutuk ida ba kooperasaun defeza, estabilidade rejional no kolaborasaun ba tempu naruk,” nia afirma.
(jen)
