DILI, STLTIMORLESTE.com – Tekniku Ministeriu Edukasaun (ME) servisu hamutuk ho Komisaun Funsaun Publika (KFP), Instituto Nasional Seguransa Sosial (INSS) identifika ona profesores moras prelongada 40 resin iha munisipiu tolu.
João Amaral hanesan Diretor Nasional Rekursu Umanu husi Ministeriu Edukasaun hatoo asuntu nee ba jornalista STL iha nia knaar fatin Vila Verde, Kinta nee (12/06/2025).
“Kona-ba atu ba halo verifikasaun iha Munisipiu Manufahi hau tau hela iha ajenda, lo-loos nee dia 18 agora, maibe tanba dia 19 feriadu, neebe ami sei tenta hela ho Diretor Edukasaun Munisipiu sira, atu nunee sira bele tau ajenda nee ba loron seluk, depende ba sira koordena ho profesores sira neebe mak moras nee, ho nunee iha loron seluk ami bele tun ba iha terenu,” katak nia.
João dehan, tekniku sira identifika ona profesores moras prelongada iha Munisipiu Likisa 22, nee iha ona prosesu ba desizaun husi INSS no komisaun servisu hamutuk ho ministeriu atu entrega ona ba iha INSS.
“Baukau iha 30 resin, neebe agora sei prienxe hela rekezitus balun, depois sira submete mai, ami hatoo fali iha komisaun, depois husi komisaun entrega ba INSS hodi hasai desizaun hanesan ho Likisa ninia, Manatuto mos hanesan fo esplikasaun ba sira, agora sei prienxe hela rekezitus balun tuir lei INSS nian, nee duni profesores nain 40 resin mak identifika ona, tuir planu sei ba verifika iha Munisipiu Manufahi,” nia esplika.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prelongada nee dadus haruka ba ona iha rekursu umanu nasional.
“Kona-ba ita nian profesores neebe moras prelongada nee ita haruka ona dadus ba ita nian rekursu umanu nasional ME nian, atu nunee bele haree asuntu ida nee,” nia afirma.
(jac)
